Þetta segir Brynjar í athugasemd á Facebook-síðu hans, í svari við spurningu um hvort að hann eða Jón Gunnarsson dómsmálaráðherra, ætli sér að tjá sig um það þegar lögregla hafði afskipti af unglingnum.
Málið má rekja til þess að lögregla, í tengslum við leit hennar að strokufanganum Gabríel Douane Boama, sem var handtekinn í nótt, hafði í tvígang afskipti af sextán ára dreng, sem er dökkur á hörund líkt og Gabríel og með áþekka hárgreiðslu.
Lögregla sagðist vera að fylgja ábendingum sem borist hefðu um mögulegan viðverustað Gabríels. Lögreglan hefur verið sökuð um kynþáttafordóma vegna málsins.
Ekkert nýtt að ábendingar reynist rangar
Brynjar virðist þó gefa lítið fyrir slíkar ásakanir, og segir í athugasemdinni að lögregla þurfi einfaldlega að fylgja þeim ábendingum sem hún fær þegar verið er að leita að eftirlýstum mönnum.
„Það er ekki nýtt að slíkar ábendingar reynist rangar og má segja að slíkt gerist í öllum svona málum. Rauðhærðir og skeggjaðir lenda oft í þessu veseni. Menn þurfa að vera sérkennilega innréttaðir til að sjá rasisma í þessu máli, og jafnvel plebbalegir,“ skrifar Brynjar.
Sigríður Björk Guðjónsdóttir ríkislögreglustjóri, sagði í kvöldfréttum Stöðvar 2 í gær að henni þætti leitt að hinn sextán ára drengur hefði dregist inn í málið. Ræða þyrfti hvernig bæta mæti aðgerðir, lögregla yrði hins vegar að fylgja eftir ábendingum í leit að eftirlýstum manni.
Jón Gunnarsson, dómsmálaráðherra og yfirmaður Brynjars, sagði í gær að hann myndi eiga samtal við ríkislögreglustjóra vegna málsins. Óheppilegt væri að það hafi átt sér stað og að draga yrði lærdóm af því. Mikilvægt væri þó að sýna lögreglu skilning, enda hafi hún verið að leita að eftirlýstum manni, sem teldist hættulegur umhverfi sínu.
Bendir á að rauðhærðir og skeggjaðir tilheyri ekki viðkvæmum minnihlutahóp
Eiríkur Rögnvaldsson, prófessor emeritus, er einn af þeim sem gagnrýnir Brynjar vegna ummæla hans. Deilir hann frétt Kjarnans af ummælum Brynjars á Facebook og bendir á að rauðhærðir og skeggjaðir séu ekki sérstaklega viðkvæmur minnihlutahópur.
„Ég hef nú alveg sloppið hingað til, en það er kannski bara af því að rauða hárið er orðið brúnt og skeggið farið að grána. En án gamans - það þarf alveg sérkennilega forréttindablindu eða ósvífni, nema hvort tveggja sé, til að bera þetta saman. Við rauðhærðu og skeggjuðu karlarnir erum ekki sérstaklega viðkvæmur minnihlutahópur sem hefur mátt búa við einelti og alls kyns mismunun,“ skrifar Eiríkur.
