Stjórnvöld nýttu ekki forkaupsréttinn á Fjaðrárgljúfri

Fréttablaðið greinir frá þessu en áður hafði verið sagt frá því að kaupandi væri loks fundinn að jörðinni, en gljúfrið er afar vinsæll ferðamannastaður sem sló í gegn eftir að poppstjarnan Justin Bieber heimsótti það. 

Gljúfrið er hluti af jörðinni Heiði og samkvæmt heimildum blaðsins hljóðar samþykkt kauptilboð einkaaðilans upp á 300 til 350 milljónir króna. 

Landverðir á vegum Umhverfisstofnunar hafa sinnt gljúfrinu síðustu árin og hefur aðgangur verið ókeypis, en nú þegar það virðist komið í einkaeigu er óljóst hvort nýji eigandinn hyggi þar á gjaldtöku, segir að lokum í blaðinu.