Um­­fjöllun: Tap­­lausar eftir hetju­­lega bar­áttu í hitanum en samt á heim­­leið af EM

Frakkar voru búnir að vinna riðilinn en það eru Belgar, liðið sem rétt slapp með jafntefli á móti Íslandi í fyrsta leik, sem er komið áfram í átta liða úrslitin. Stelpurnar voru mjög svekktar eftir fyrsta leik mótsins og á endanum var það hann sem eyðilagði fyrir okkar liði.

Varsjáin var okkur vissulega hjálpleg í kvöld, gaf okkur víti og tók tvö mörk af Frökkum en við þurftum meiri hjálp frá hinum leiknum í Manchester.

Íslenska liðið tapaði ekki leik á mótinu en þarf samt að kveðja England eftir þrjú jafntefli. Sögulegur árangur en engin þjóð hafði setið eftir í riðlakeppni EM án þess að tapa leik.

Leikplanið út um gluggann við fyrstu hviðu

Það þurfti sterk bein til að standa í lappirnar eftir verstu hugsanlegu byrjun á móti heimsklassa liði eins og Frakkland er með. Mark á sig eftir 44 sekúndur og leikplanið fokið út um gluggann við fyrstu hviðu.

Íslenska kvennalandsliðið gat vissulega séð um það sjálft að koma sér áfram í átta liða úrslitin á Evrópumótinu í Englandi en stelpurnar okkar gátu líka vonast eftir hagstæðum úrslitum frá Manchester þar sem hinn leikur riðilsins var spilaður á sama tíma á milli Belgíu og Ítalíu.

Mótherjinn var ekki af verri gerðinni heldur gríðarlega sterkt franskt landslið. Á endanum var lukkan hvorki með íslenska liðinu í Manchester eða í Rotherham. Belgar náðu í þrjú stig sem þær þurftu til að tryggja sér annað sæti riðilsins.

Afdrifarík upphafsmínúta

Lykilatriði var að halda hreinu og vonast eftir marki úr skyndisókn eða föstu leikatriði. Allir slíkar draumauppskriftir voru fljótar að deyja því Frakkar skoruðu á upphafsmínútu leiksins.

Þorsteinn Halldórsson hafði ekki breytt miklu í síðustu þremur leikjum en breytti út af þeim vana með því að gera þrjár breytingar þar af tvær þeirra á vörninni. Hann lofaði á blaðamannafundi að hann myndi koma á óvart og stóð við það.

Það var auðvelt að gagnrýna eftir aðeins nokkrar sekúndur því nýja íslenska vörnin var fljót að opnast eða strax á fyrstu mínútu leiksins.

Hreinsun mistókst illilega hjá íslenska liðinu og Frakkarnir spiluðu í framhaldinu allt of auðveldlega í gegnum miðja vörnina. Ingibjörg Sigurðardóttir hafði komið inn í liðið og leit ekki vel út þarna, komin út úr stöðu og lét fara illa með sig.

44 sekúndur og lentar undir. Sannkölluð martraðarbyrjun. Varamaður hinnar meiddu Marie-Antoinette Katoto, Melvine Malard, átti í litlum vandræðum með að renna boltanum í markið. Það tók Frakka innan við mínútu að gleyma Katoto.

Snilldartaktar Karólínu Leu

Snilldartaktar Karólínu Leu Vilhjálmsdóttur og fast en óhnitmiðað skot snemma leiks sýndi að okkar konur ætluðu ekki að leggja árar í bát. Sveindís Jane Jónsdóttir skallaði síðan hornspyrnu Hallberu Gísladóttur í slá. Það var líf í okkar konum.

Íslenska liðið gafst vissulega ekki upp en Frakkarnir áttu samt áfram allt of auðvelt með að spila sig upp völlinn. Íslenska liðið leit í byrjun eins og ætla að vera fallbyssufóður en karakter liðsins er sterkur og með sameiginlegu átaki gekk þeim betur að loka svæðunum eftir því sem leið á hálfleikinn. Það voru líka færi sem féllu fyrir okkar konur.

Berglind Björg Þorvaldsdóttir var týnd i byrjun en reyndi síðan að koma sér inn í leikinn með góðum hlaupum og pressu á varnarmenn Frakka. Hún var þó einu sinni of sein í tæklingu og fékk að launum fyrsta gula spjald liðsins á mótinu.

Berglind fékk síðan algjört dauðafæri á markteig skömmu síðar eftir hornspyrnu Karólínu Leu en hitti boltann skelfilega illa. Þar lá eitt af þessum færum sem urðu að falla með okkar konum. Færi sem markaskorari á að setja á markið.

Það var samt helst hætta í kringum aðgerðir Karólínu Leu í fyrri hálfleiknum en eins var Sara Björk Gunnarsdóttir að spila sinn langbesta hálfleik á Evrópumótinu. Annan leikinn í röð gekk eins vel að koma Sveindísi inn í leikinn.

Hörmungarnar heltust yfir liðið eftir stuttan tíma í seinni hálfleik. Fyrst komst Belgía yfir í hinum leiknum og svo meiddist Sveindís Jane. Hún var ekki söm eftir það og staðan í riðlinum hafði gerbreyst.

Agla María Albertsdóttir hafði ekki átt góðan leik fram að þessu en náði mjög góðri marktilraun á 56. mínútu leiksins. Hún fékk við það sjálfstraust og leit mun betur út eftir það.

Sara Björk var nálægt því að kóróna mjög góða frammistöðu sína með skalla framhjá eftir horn og íslenska liðið hélt áfram að ógna í föstum leikatriðum.

Af hverju var Sara Björk tekin af velli?

Af einhverjum óskiljanlegum ástæðum var hún hins vegar tekin af velli eftir klukkutíma leik. Sara átti kannski að fara út af í hinum tveimur leikjunum en ekki í þessum leik.

Hvort sem það hitanum að kenna eða öðru þá var rólegra yfir leiknum í seinni hálfleik. Harkan kannski meiri í návígunum en hlaupin hægari og bitlausari.

Frakkarnir héldu áfram að ógna og boltinn skall bæði í slá og stöng íslenska marksins. Malard átti aftur á móti ekki í miklum vandræðum með að skora eftir að franska liðið splundraði íslensku vörninni upp við endamörk. Markið fékk þó ekki að standa því Varsjáin dæmdi það af vegna rangstöðu.

Var lukkan kannski með íslenska liðinu eftir allt saman?

Berglind gerði frábærlega í að búa sér til skotfæri rétt fyrir utan teig en skotið fór því miður fram hjá markinu. Það var enn líf í okkar konum.

Draumurinn virtist deyja endanlega rétt fyrir leikslok þegar Frakkar skoruðu sitt annað mark.

Þorsteinn Halldórsson hafði rétt áður gert sókndjarfa skiptingu en Frakkarnir skoruðu strax. Aftur var markið dæmt af hjá myndbandsdómurunum. Stelpurnar voru enn á lífi.

Flautaði markið af og leikinn af í framhaldinu

Karólína Lea átti lokafærið en skot hennar fór yfir. Við nánari athugun og hjálp frá Varsjánni fékk íslenska liðið víti. Dagný Brynjarsdóttir steig svellköld á punktinn og jafnaði metin. Belgar voru þá búnir að vinna sinn leik og Ísland þurfti því annað mark. Vandamálið var að dómarinn flautaði markið og leikinn af í sama vettvangi.

Hetjuleg barátta í hitanum var ekki nóg og stelpurnar voru á leið heim af EM.

Glódís Perla Viggósdóttir og Karólína Lea Vilhjálmsdóttir héldu uppteknum hætti á þessum móti og eru tveir bestu leikmenn liðsins ásamt Söndru Sigurðardóttur markverði. Sara Björk lék sinn besta leik á mótinu og Dagný skilaði sínu. Ingibjörg byrjaði skelfilega en vann sig inn í leikinn eftir það.

Það eru bullandi möguleikar hjá þessu liði okkar og þessi reynsla, þó svekkjandi sé, verður vonandi til þess að skila þeim í gegn samskonar mótlæti á komandi árum. Ég ætla að fylgjast spenntur með.