Vann Berglindi en er nú orðin liðsfélagi hennar

Hollenski miðillinn De Telegraaf segir að PSG greiði, að meðtöldum bónusgreiðslum, 150.000 evrur fyrir Groenen en það jafngildir um 21 milljón króna. Miðillinn segir að United hafi í fyrstu hafnað því að selja leikmanninn en látið eftir þegar tilboðið var orðið svo gott.

Groenen er 27 ára gömul landsliðskona Hollands og var einmitt í hollenska landsliðinu sem vann Ísland í leiknum um sæti á HM fyrr í þessum mánuði. Þar spilaði hún meðal annars gegn Berglindi Björg Þorvaldsdóttur sem PSG keypti frá Brann fyrir skömmu.

Hjá PSG hittir Groenen einnig fyrir liðsfélaga sinn úr hollenska landsliðinu, Lieke Martens, sem kom frá Barcelona í sumar. Martens missti af landsleiknum gegn Íslandi vegna meiðsla.

Groenen hefur á sínum ferli spilað með Essen, Duisburg og Frankfurt í Þýskalandi, sem og Chelsea og United í Englandi, en hún lék fimmtíu deildarleiki fyrir United-liðið á síðustu þremur árum. Samningur hennar við PSG er til ársins 2025.