Gjald­skrá sund­laugarinnar í Gríms­nesi standist ekki á­kvæði stjórnar­skrár

Ráðuneytið sendi erindi til sveitarfélagsins fyrr í mánuðinum vegna kvörtunar einstaklings sem hefur óskað eftir úrskurði ráðuneytisins vegna óútskýrðrar mismununar við gjaldtökuna, líkt og þar segir.

Vill maðurinn meina að gjaldskrá sundlaugarinnar standist ekki jafnræðisreglu stjórnarskrárinnar, meginregluna um bann við mismunun eftir búsetu og sömuleiðis að gjaldskráin sé ekki í samræmi við lögmætis- eða réttmætisreglu stjórnsýsluréttar.

Árskortið nærri þrisvar sinnum dýrara

Þegar litið er til gjaldskrár íþróttamiðstöðvarinnar að Borg í Grímsnesi segir á heimasíðunni að stakur tími fyrir fullorðna í sund kosti 1.050 krónur. Hægt sé að kaupa árskort í sund og þreksal á 35 þúsund krónur. Á fundi sveitarstjórnar í desember síðastliðinn var ákveðið að halda áfram að bjóða fullorðnum íbúum með lögheimili í sveitarfélaginu árskort í sund, þreksal og íþróttasal á 12 þúsund krónur.

Árskortið er því nærri þrisvar sinnum dýrara fyrir þá sem eiga ekki lögheimili í sveitarfélaginu. Ekki er að sjá á heimasíðu íþróttamiðstöðvarinnar að gjaldskrá fyrir íbúa með lögheimili í sveitarfélaginu sé sérstaklega auglýst.

Fyrir börn með lögheimili utan Grímsnes- og Grafningshrepps er árskortið á 17.500 krónur, en 4.500 krónur fyrir börn með lögheimili í sveitarfélaginu.

Finnst ekkert leiðinlegt að vera með vesen

Maðurinn sem kvartaði til sveitarfélagsins og síðar innviðaráðuneytisins heitir Björgvin Njáll Ingólfsson. Hann á sjálfur sumarbústað í Grímsnes- og Grafningshreppi og svíður það að fá ekki að njóta sömu kjara og þeir sem eru með skráð lögheimili í sveitarfélaginu.

Björgvin Njáll segir að hann borgi fasteignagjöld og fleira til sveitarfélagsins, en hann geti hins vegar ekki verið með skráð lögheimili þar sem um er að ræða sumarbústað.

„Ég er með bústað ekki langt frá Borg í Grímsnesi og datt á sínum tíma í hug að það gæti verið sniðugt að kaupa árskort í sundlaugina, enda sá ég fram á að vera reglulegur gestur þarna í lauginni. En þá tók ég eftir því að það kostaði margfalt meira fyrir mig að fara í sund á Borg samanborið við þá sem eru með lögheimili í hreppnum. Mér finnst augljóst að þetta brjóti í bága við jafnræðisákvæði stjórnarskrárinnar. Svo finnst mér nú ekkert leiðinlegt að búa til smá vesen, svo ég sendi erindi til sveitarfélagsins fyrir um ári,“ segir Björgvin Njáll í samtali við Vísi.

Sveitarstjóra og lögmanni falið að svara ráðuneytinu

Erindi ráðuneytisins var tekið fyrir á fundi sveitarstjórnar Grímsnes- og Grafningshrepps í síðustu viku og hefur nýjum sveitarstjóra, Iðu Marsibil Jónsdóttur, verið falið að svara erindinu í samráði við lögmann sveitarfélagsins. Í bréfi ráðuneytisins segir að mat verði lagt á hvort að tilefni sé til að taka stjórnsýslu sveitarfélagsins vegna gjaldskrárinnar til formlegrar umfjöllunar á grundvelli sveitarstjórnarlaga.

Björgvin Njáll sendi fyrst kvörtun til sveitarstjórnar vegna málsins sumarið 2021 og barst honum svar frá þáverandi sveitarstjóra, Ingibjörgu Harðardóttur, í september sama ár. Í svari sveitarstjórans, sem fréttastofa hefur undir höndum, er lögð áhersla á að rekstur sundlauga sé ólögbundið verkefni sveitarfélaga.

Rekin í þágu íbúa sveitarfélagsins

Í niðurlagi bréfsins segir að sundlaugin og þreksalurinn séu opin öllum óháð búsetu. „Eini munurinn er sá að íbúar sveitarfélagsins geta keypt árskort á hagstæðara verði en þeir sem eru með lögheimili utan sveitarfélagsins. Ástæða þess að íbúar sveitarfélagsins geta keypt árskort á hagstæðara verði en þeir sem eru með lögheimili utan sveitarfélagsins er annars vegar súað íþróttamiðstöðin er rekin af sveitarfélaginu í þágu íbúa þess […] Reynslan sýnir að afslátturinn hefur stóraukið notkun íbúa á sundlauginni og ekki síst yfir vetrartímann. Þannig má fullyrða að ákvörðun um lækkun gjalda til íbúa hafi stuðlað að bættri lýðheilsu og aukinni hreyfingu íbúa sveitarfélagsins.

Hins vegar greiða íbúar útsvar til sveitarfélagsins, sem er meðal annars nýtt til að fjármagna rekstur sundlaugarinnar til viðbótar við aðgangseyrinn. Sama gildir ekki um þá gesti íþróttamiðstöðvarinnar sem eru með lögheimili í öðrum sveitarfélögum. Af þessum sökum telur sveitarfélagið að það sé eðlilegt og málefnanlegt að íbúar fái afslátt af árskortum í íþróttamiðstöðina,“ segir í svari sveitarstjórans þáverandi.

Innviðaráðuneytið óskar eftir umsögn frá sveitarfélaginu vegna málsins fyrir 3. október næstkomandi.