Með fimm kíló af amfetamíni í frysti­kistu á heimili sínu

Í ákæru segir að lögregla hafi fundið mikið magn fíkniefna – um 4,7 kíló af amfetamíni, um lítra af amfetamínvökva, auk hass og kannabis – í frystikistu í geymslu á heimili mannsins í Hafnarfirði í mars 2021.

Þá var maðurinn jafnframt ákærður fyrir vopnalagabrot með því að hafa haft í vörslum sínum tvö sverð og útdraganlega kylfu sem lögregla fann við leit í íbúðinni. Auk þess fundust tvö handjárn, lásbogi og gasskotvopn.

Maðurinn játaði brot sín afdráttarlaust fyrir dómi, en samkvæmt sakarvottorði hefur hann ekki áður gerst sekur um refsiverða háttsemi.

„Um er að ræða talsvert magn fíkniefna af miklum styrkleika, sem ákærði hafði í vörslum sínum í sölu- og dreifingarskyni sem litið verður til við ákvörðun refsingar. […] Hins vegar benda gögn málsins til þess að ákærði hafi ekki verið eigandi efnanna utan þeirra sem eru í neysluskömmtum,“ segir í dómnum. Var það einnig metið til mildunar að maðurinn hafi farið í meðferð vegna áfengis- og vímuefnavanda eftir brotið til að leitast við að koma lífi sínu á réttan kjöl og þótti hæfileg refsing þrjú og hálft ár í fangelsi.

Fram kemur að maðurinn hafi sætt gæsluvarðhaldi vegna málsins í um tíu daga eftir að hann var handtekinn í mars 2021 og kemur sá tími til frádráttar refsingunni.

Manninum er jafnframt gert að greiða þóknun til skipaðs verjanda og annan sakarkostnað, alls um milljón krónur.