„Ekki pláss fyrir okkur þarna inni“

„Þrátt fyrir að ég hafi í tvígang verið kjörin formaður stærsta verkalýðssambands verka- og láglaunafólks á þessu landi, þá er ekki pláss fyrir okkur hérna inni,“ sagði Sólveig í samtali við fréttastofu á meðan stuðningsfólk hennar, Ragnars og Vilhjálms gengu út með fagnaðarlátum. Þau telja að sér vegið innan sambandsins. Ragnar Þór Ingólfsson vildi sem minnst segja er hann gekk út en Vilhjálmur bað launafólk afsökunar á því að ekki hafi tekist að snúa bökum saman innan hreyfingarinnar. 

Sólveig segir baráttu hennar og félaga sinna, fyrir láglaunakonum sem dæmi, ekki hafa fengið viðurkenningu innan ASÍ. Hún hafi því ekki séð annan kost en að ganga út og fyrir því séu nokkrar ástæður: 

Ósómi átt sér stað

„Sá ósómi átti sér stað að í fyrsta lagi er þetta fólk að flykkja sér á bak við Ólöfu Helgu, sem hefur enn ekki sætt sig við það að hafa tapað kosningum um formann í Eflingu þó það hafi gerst 15. febrúar. Hún hefur nú síðast orðið uppvís að því að njósna um mig með Agnieszku Ewu með því að fara í gegnum tölvupósta mína,“ segir Sólveig en þær Agnieszku Ewu greinir á um lögmæti aðgangs hennar að téðu pósthólfi. Ólöf Helga Adolfsdóttir, ritari stjórnar Eflingar, bauð sig fram gegn Ragnari Þór og er nú ein í framboði til forseta ASÍ. 

„Þegar það gerðist í gær að stór hópur innan raða Alþýðusambandið ætlaði að láta reka alla Eflingarfulltrúa af af þinginu, fyrir engar sakir, þá fórum við auðvitað að hugsa okkur um. Niðurstaðan var þessi.“

Varðandi það hvort hún muni segja Eflingu úr ASÍ segist hún ætla að taka þá umræðu fyrir á stærri lýðræðislegu vettvöngum stéttarfélagsins. Hún ætli sér ekki að ræða það núna. 

Hún segir Ólöfu Helgu hafa rekið hatramma andspyrnuhreyfingu innan Eflingar. Sólveig Anna segir hana reka „skemmdarverkastarfsemi“ og hafi ekki áhuga á að vinna í sátt og samlyndi með félögum sínum. 

„Myndum aldrei frá neinn séns“

„Þau orð sem hafa verið látin falla og sú stemning sem sífellt verið mögnuð upp lætur fólk horfast í augu við það að þetta myndi aldrei ganga. Við myndum aldrei fá neinn séns til að gera nokkurn skapaðan hlut og það ástand sem ég hef mátt þola yrði aðeins endurframleitt með enn magnaðri og kröftugum hætti. Hver vill starfa í þannig félagi? Ekki ég,“ segir Sólveig og segir augljóst að klofningur hafi myndast innan sambandsins. 

Hún segir sig og sitt fólk njóta mikils stuðnings. Þetta fólk kunni að berjast og stuðningsfólk hafi vitað hvað skyldi gera þegar fyrrgreind staða hafi komið upp. 

„Framtíðarplanið mitt er núna að fara í mitt félag og tala við mína stjórn og trúnaðarráð. Byrja að gera það af fullum krafti sem skiptir mestu máli; að undirbúa þessa kjarasamninga sem við þurfum innan skamms að fara í,“ sagði Sólveig Anna að lokum og sagðist að sjálfsögðu ekki mæta á aðalþingið á morgun.