„Inn­limaði“ bíla­stæði rúss­neska ræðis­mannsins

Nágrannar ræðismannsins í Turku í Suður-Finnlandi hafa mótmælt veru hans þar og bílastæði sem hann hefur fyrir utan bygginguna. Fréttir af erjunum vöktu athygli Jarnos Virtala sem býr í Tampere. Hann taldi tíma til kominn að grípa til aðgerða, ekki síst eftir loftárásir Rússa á óbreytta borgara í Úkraínu í byrjun vikunnar.

Virtala tók sig því til og ók rúmlega 160 kílómetra til Turku. Hann segir Helsingin Sanomat að hann hafi verið innblásinn af málamyndaatkvæðagreiðslum sem leppstjórnir Rússa héldu á dögunum til að réttlæta innlimun Vladímírs Pútín á fjórum úkraínskum héruðum í Rússland.

„Ég ákvað að halda eins manns þjóðaratkvæðagreiðslu um hvort að bílastæðið tilheyrði rússneska sambandsríkinu eða Úkraínu. Niðurstaða þjóðaratkvæðagreiðslunnar var sú að stæðið tilheyrði Úkraínu,“ segir Virtala.

Til að fagna innlimuninni málaði Virtala stæðið gult og blátt, í fánalitum Úkraínu. Það tók hann nokkrar klukkustundir en hann segir að vegfarandi sem er kvæntur úkraínskri konu hafi hjálpað honum um tíma. Sjá má mynd af Virtala við iðju sína í frétt staðarblaðsins Turun Sanomat.

Markus Mattsson, vegafarandinn umræddi, segir í Facebook-færslu að hann hafi ákveðið að rétta Virtala hjálparhönd til bæta tengsl Turku og Tampere.

„Það er gamall rígur á milli Turku og Tampere þannig að þetta sætir tíðindum en óvenjulegir tímar kalla á óvenjuleg ráð,“ skrifar Mattsson í léttum dúr.

Ræðismaðurinn tók myndir

Virtala segir að lögreglubílar hafi ekið fram hjá nokkrum sinnum á meðan þeir máluðu stæðið en lagana verðir hafi ekki gert neinar athugasemdir við uppátækið. Rússneski ræðismaðurinn kom hins vegar út úr byggingunni og byrjaði að mynda hann við athæfið.

„Hann virtist alls ekki kátur,“ segir Virtala.

Hann óttast ekki að innlimunin dragi dilk á eftir sér fyrir hann. Engin eignaspjöll hafi átt sér stað og hægt sé að mála yfir stæðið aftur ef þurfa þykir. Lögreglan hafi þó hringt í hann þegar hann var á leiðinni heim til Tampere til að spyrja hann hvort hann teldi mögulegt að fáninn gæti laðað að sér skemmdarvarga eða önnur læti sem hún gæti þurft að hafa afskipti af.

„Ég vonast sannarlega ekki til þess. Ég sagði þeim að ef eitthvað kæmi upp á kæmi ég aftur með fötu af svartri málningu,“ segir Virtala.

Finnsk stjórnvöld hættu nýverið að veita rússneskum ferðamönnum vegabréfsáritun eftir að fjöldi rússneskra karlmanna reyndi að komast úr landi í kjölfar herkvaðningar sem Pútín forseti tilkynnti um í síðasta mánuði.

Innrás Rússa leiddi ennfremur til þess að Finnar og Svíar sóttu um aðild að Atlantshafsbandalaginu. Þeir eru ekki enn orðnir aðilar að bandalaginu þar sem Tyrkir og Ungverjar hafa ekki samþykkt inngöngu þeirra.