Rússar hafa lagt skóla- og heilbrigðiskerfi Úkraínu í rúst

Þetta er í fimmta sinn sem heimsþing kvenleiðtoga er haldið í Hörpu í Reykjavík. Það verður að segjast eins og er andrúmsloftið á þinginu er allt annað en flestum ráðstefnum í Hörpu. Þar eru sófar, stólar, blóm og aðar skreytingar. Allt útlit hannað af Dögg Thomsen. Mjög afslappandi andrúmsloft.

Það sama á við um þingsalinn þar sem frummælendur um öll helstu málefni töluðu til þinggesta á sviði í miðjum sal Silfurbergs. Á þinginu er snert á flestum meginmálum mannkynsins.

Christy Tanner fyrrverandi ritstjóri frétta hjá CBS í Bandaríkjunum rekur nú eigið ráðgjafafyrirtæki fyrir fjölmiðla og hefur verið samstarfsaðili heimsþingsins frá upphafi.

Hún segir að fyrir hvert þing væri farið yfir alþjóðlega könnun Kantar Public á viðhorfi almennings til kvenleiðtoga á mörgum sviðum samfélagsins og komi Ísland yfirleitt vel út úr þeim könnunum.

Þrátt fyrir það telja aðeins 33 prósent kvenna á Íslandi að jafnrétti kynjanna hafi verið náð en 66 prósent karla.

„Niðurstöðurnar á fyrsta árinu voru að jafnaði ekki góðar þótt Ísland væri númer eitt varðandi jákvætt viðhorf til kvenleiðtoga. Á undanförnum fimm árum höfum við ekki séð neinar breytingar og það er virkilega svekkjandi,“ segir Tanner.

Leiðtogaþingið í Hörpu sé því mjög mikilvægur vettvangur til að deila reynslu, hugmyndum og til að efla konur í leiðtogastöðum.

„Ég held að það sé mikilvægt að við gefum okkur tíma og rými til að ræða sum þeirra mála sem hafa áhrif á okkur allar sem kvenleiðtoga, ekki bara á milli atvinnugreina, stjórnsýslu, viðskipta, akademíunnar og fjölmiðla, heldur einnig á milli landa. Eitt af því dásamlega við þennan vettvang er að við fáum

hnattræna heildarsýn,“ segir Tanner.

En um fimm hundruð konur frá um 100 löndum sækja þingið. Þeirra á meðal eru tvær þingkonur frá Úkraínu. Önnur þeirra er Tetyana Tsyba úr flokki Úkraínuforseta og hefur hún unnið náið með honum. Hún segir mikilvægt að umheimurinn skilji umfang hryðjuverkastríðs Rússa.

„Það er alveg hræðilegt fyrir konur, börn og karla, fyrir alla. Ef satt skal segja er það hræðilegt fyrir allan heiminn. En kannski skilur umheimurinn það ekki eins og við," segir Tsyba.

Þannig væri öll kennsla og heilbrigðisþjónusta í landinu í raun í rúst. Staðan versni dag frá degi með skorti á rafmagni og vatni eftir árásir Rússa.

„Það eru mikil vandamál hvað varðar heilbrigðisþjónustu því sjúkrahúsin okkar hafa verið sprengd. Um það bil 900 spítalar hafa verið sprengdir og um það bil 3.000 skólar og leikskólar hafa verið sprengdir," segir Tetyana Tsyba.