„Að vinna þá núna yrði risastórt“

Ísland er í þriðja sæti síns riðils í undankeppni HM, með einum sigri meira en Georgía, en þrjú efstu liðin komast á HM. Sex umferðum af tíu er lokið en hversu raunhæft er að Ísland verði fámennasta þjóð sögunnar til að komast á HM?

„Tölfræðilega séð er þessi leikur við Georgíu ekkert smá mikilvægur varðandi það. Það eru fjórir leikir eftir og allt getur gerst, en ef við náum sigri á móti Georgíu komumst við tveimur sigrum yfir þá, svo það er risastórt. En hvort sem við vinnum þá eða ekki þá gæti þetta endað með úrslitaleik við þá úti í Georgíu í lokin. Að vinna þá núna yrði risastórt,“ segir Tryggvi og tekur undir að íslenska liðið sé í raun í frekar súrrealískum aðstæðum, eftir að hafa skapað sér alvöru möguleika á að komast á HM:

„Þetta er svolítið fáránlegt, en bara geggjað. Það er mjög gaman að eiga séns á að fara á svona stórt mót.“

Ísland hefur unnið alla þrjá heimaleiki sína í keppninni til þessa, gegn Úkraínu, Ítalíu og Hollandi, og fóru þeir leikir fram í Ólafssal vegna vatnsskemmda í Laugardalshöll. Nú snýr liðið aftur í Höllina:

„Heimavöllurinn er okkur allt. Ólafssalur var mjög góður við okkur, og við unnum alla leikina þar, en það er gott að koma aftur heim í Höllina. Ég þekki hana vel, og margir í liðinu. Þetta er okkar heimavöllur og það verður gaman að vera aftur fyrir framan stóra stúku,“ segir Tryggvi.

„Mjög erfitt að stoppa hann“

Eftir að hafa spilað við góðan orðstír með Zaragoza í efstu deild Spánar og Evrópukeppni síðustu ár þekkir Tryggvi ágætlega til lykilmanna í georgíska liðinu:

„Þetta eru allt hörkuleikmenn. [Thad] McFadden er svakalegur skotmaður og tekur leiki á Spáni þar sem hann setur hátt í þrjátíu stig. Hann var með 26 gegn okkur. Það er mjög erfitt að stoppa hann. Síðan er [Tornike] Shengelia einn besti „fjarki“ í Euroleague, algjör hörkuleikmaður. Síðan er fimman hjá þeim, [Giorgi] Shermadini, í spænsku deildinni og ein besta fimman þar. Þetta er því hörkulið og alvöru áskorun fyrir okkur,“ segir Tryggvi.

Gekk illa en allt breytt með nýjum þjálfara

Hann átti flottan leik í afar óvæntum en fræknum sigri Zaragoza gegn Real Madrid um helgina, eftir að Zaragoza hafði tapað fyrstu sex deildarleikjum sínum á tímabilinu. Tryggvi segir að þjálfarabreytingar, þar sem Porfirio Fisac tók við af Martin Schiller fyrir hálfum mánuði, hafi gert liðinu gott:

„Þetta byrjaði frekar illa hjá okkur og svo unnum við Madrid, sem er frekar fáránlegt en gaman að því. Við byrjuðum með annan þjálfara, og aðeins aðra uppsetningu á liðinu, og það gekk frekar illa hjá mér persónulega og þá hjá liðinu í heild. Núna erum við að ná að laga þetta með nýja þjálfaranum, Porfi, og unnum þennan leik gegn Madrid sem er góðs viti.“

Leikur Íslands við Georgíu er í Laugardalshöll á föstudag klukkan 19:30. Miðasala á leikinn er í appinu Stubbur.