Víða vinda­samt og rigning á suð­austan­verðu landinu

Á vef Veðurstofunnar segir að það bæti smám saman í vind í dag, þrettán til tuttugu metrar á sekúndu sunnantil á landinu eftir hádegi, en mun hægari og þurrt um landið norðanvert. Hiti á landinu verður á bilinu fjögur til tíu stig.

Vegna hinnar miklu úrkomu á Suðausturlandi og sunnanverðum Austfjörðum síðustu daga er talin aukin hætta á skriðuföllum og vatnavöxtum í ám og lækjum.

„Suðaustan 10-18 m/s á morgun, en heldur hvassara suðvestanlands í morgunsárið. Skúrir víða um land, einkum suðaustantil, en úrkomulítið á Norðurlandi. Áfram milt í veðri. Eftir hádegi fer svo að draga úr vindi.“

Veðurhorfur á landinu næstu daga

Á fimmtudag: Suðaustan 10-18 m/s, en dregur úr vindi eftir hádegi. Allvíða skúrir, en rigning suðaustanlands, og úrkomulítið á Norðurlandi. Hiti 5 til 10 stig.

Á föstudag: Suðaustan 5-13 og stöku skúrir, en rigning suðaustantil og á Austfjörðum. Hiti 2 til 8 stig.

Á laugardag: Vaxandi austan- og suðaustanátt, 8-15 m/s síðdegis en 13-20 sunnantil. Rigning suðaustan- og austanlands, en þurrt að kalla á Norðvestur- og Vesturlandi. Hiti 0 til 8 stig.

Á sunnudag, mánudag og þriðjudag: Ákveðin suðaustan- og austanátt og dálítil væta af og til, en rigning suðaustanlands. Áfram milt í veðri.