Princess Diaries 3 stað­fest: Mætir Mia Ther­mopolis aftur á skjáinn?

Árið er 2001. Anne Hathaway skaust upp á stjörnuhimininn í hlutverki Miu Thermopolis, laumu prinsessunnar frá Genóvíu, í kvikmyndinni „The Princess Diaries“ sem byggð var á samnefndum bókum. Ásamt Hathaway léku í kvikmyndinni Julie Andrews, Hector Elizando, Heather Matarazzo og Sandra Oh. Meg Cabot, höfundur bókanna var í teymi handritshöfunda og söngkonan Whitney Houston heitin var ein af framleiðendum myndarinnar.

Kvikmyndin fjallar um hina sextán ára Miu Thermopolis frá San Fransisco sem kemst óvænt að því að hún er konungborin og réttmætur erfingi krúnunnar í Genóvíu. Með uppgötvuninni koma allskyns áskoranir fyrir Miu eins og að læra að haga sér líkt og prinsessu sæmir. Þá áttar hún sig á því hverjir hennar raunverulegu vinir eru.

Kvikmyndin stimplaði sig fljótt inn í hjörtu margra og var myndin til dæmis ein sú vinsælasta sem kom út í Bandaríkjunum þetta árið.

Aðdáendur kvikmyndarinnar voru sólgnir í meira enda kvikmyndin byggð á bók Meg Cabot. Framhaldsbók seríunnar út í júní 2001 svo möguleiki á framhaldi var mikill. Nú eru bækurnar orðnar ellefu talsins og á sú tólfta að koma út á komandi ári.

Árið 2004 var biðin eftir nýrri kvikmynd á enda. Þá kom önnur kvikmyndin út, „The Princess Diaries 2: Royal Engagement.“ Stór hluti upphaflega leikaraliðsins sneri aftur ásamt viðbótum en sem dæmi um liðsauka má nefna Raven-Symoné og Chris Pine ásamt fleirum.

Að þessu sinni heldur Mia til Genóvíu til þess að undirbúa sig undir það að taka við drottningarembættinu af ömmu sinni, sem leikin er af Julie Andrews. Þó gengur ekki allt upp eins og það á að gera og virðist Mia tilneydd til þess að trúlofa sig áður en hún má taka við embættinu. Í kjölfarið hefst leitin að hinum eina rétta og skjóta vafasamir aðilar upp kollinum.

Auk rithöfundarins Meg Cabot sá Shonda Rimes um handritsgerð ásamt fleirum og var Whitney Houston enn ein framleiðenda.

Í mörg ár hafa orðrómar um fleiri kvikmyndir í seríunni verið á sveimi. Nú nýlega sagði Hathaway til dæmis í samtali við ET að hún væri svo sannarlega til í að þriðja myndin yrði að veruleika. Hún væri í raun að ýta á eftir því. Einnig sagði Andrews í samtali við ET að hún myndi vilja vera hluti af annarri kvikmynd til viðbótar ef pláss væri fyrir hana.

Nú virðist ósk Hathaway ætla að rætast en Variety hefur greint frá því að vinnsla þriðju kvikmyndarinnar sé hafin hjá Disney. Þó kemur fram að ekki hafi fengist staðfest hvort Hathaway og Andrews ásamt öðrum leikurum eldri myndanna séu hluti af verkefninu. Þó er ljóst að einhverjar breytingar verði á framleiðslu og leikstjórn þar sem Garry Marshall, leikstjóri fyrri kvikmyndanna tveggja er fallinn frá auk framleiðandans og söngkonunnar Whitney Houston.

Búist er við því að kvikmyndirnar haldi áfram þaðan sem frá var horfið en tíminn einn mun leiða í ljós hvaða leið verður farin hvað varðar framleiðslu kvikmyndarinnar. Þó vonast eflaust flestir aðdáendur til þess að sjá kunnugleg andlit á ný.