María segir upp sem for­stjóri Sjúkra­trygginga

Kæra samstarfsfólk,

nú eru fjögur ár síðan ég kom hér til starfa. Hef notið hvers dags í samstarfi við ykkur þótt það hafi verið ýmsar brekkur á leiðinni. Okkur hefur líka tekist margt býsna vel.

Sett hefur verið langtímastefna (í fyrsta sinn frá stofnun SÍ), skipulag endurskoðað í kjölinn og bætt að mestu úr þeim alvarlegu veikleikum sem fram komu í skýrslu Ríkisendurskoðunar árið 2018 (”Sjúkratryggingar Íslands sem kaupandi heilbrigðisþjónustu”), m.a. með stofnun hagdeildar og eftirlitsdeildar. Staða upplýsingatæknimála hefur tekið stakkaskiptum: Í byrjun starfs míns lágu fyrir tvær úttektir á stöðu þessa málaflokks sem allar voru mjög neikvæðar. Í dag hefur verið byggt upp öflugt upplýsingatæknisvið, ráðist í stórfelldar umbætur á öryggismálum, vefurinn endurgerður og gagnvirk birting gagna hafin, stafræn samskipti við veitendur og notendur þjónustu byggð upp og fyrstu áfangar vöruhúss gagna teknir í notkun. Sett hefur verið stefna um upplýsingatækni og öryggismál og unnið markvisst að innleiðingu stjórnkerfis upplýsingaöryggis.Skjalaumsýsla og þjónustuferlar eru í endurskoðun samhliða gerð þjónustustefnu og endurskoðun gæðamála. Byggt hefur verið upp samstarf við lykilaðila á heibrigðissviði og helstu notendasamtök. Starfsumhverfi hefur verið bætt á fjölmarga vegu og starfsánægja hefur aldrei mælst hærri þó svo enn sé nokkuð í land, ekki síst hvað ánægju með laun varðar. Framleiðni hefur stóraukist hvort sem litið er til fjölda gerðra samninga, afgreiðslu umsókna eða þjónustu á sviði hjálpartækja.

Í þessi fjögur ár hef ég unnið að því að draga meira fé til þessarar stofnunar – annars vegar til þess að hún geti sinnt sínum verkefnum skv lögum en hins vegar til þess að hún geti boðið samkeppnishæf laun. Við viljum að sjúkratryggingar séu eftirsóttur vinnustaður vegna spennandi verkefna, góðs starfsanda og frábærs vinnuumhverfis og við viljum geta borgað laun í samræmi við það sem gerist annars staðar og í samræmi við ábyrgð og álag. Það er skemmst frá því að segja að mér hefur ekki tekist að styrkja rekstrargrunn stofnunarinnar – fastar fjárveitingar til okkar í dag eru beinlínis lægri á föstu verðlagi heldur en árið 2018 og við vitum öll hve mörg ný verkefni hafa bæst við hjá okkur á þeim árum sem liðin eru síðan þá.

Fyrir hönd stofnunarinnar ber ég ábyrgð á þessari stöðu og hlýt að axla hana. Ég hef því sagt upp starfi mínu sem forstjóri. Uppsögnin tók gildi 1.desember.

Það var mjög erfið ákvörðun – því eins og ég sagði þá hef ég sannarlega notið þess að starfa með ykkur öllum og hef gert það sem í mínu valdi stendur til að efla þessa stofnun með hjálp ykkar allra. Það hefur hins vegar ekki tekist að styrkja rekstrargrundvöll hennar til að ná ásættanlegum árangri – að við getum rækt lögboðnar skyldur okkar með sóma og boðið samkeppnishæf laun. Við þessar aðstæður treysti ég mér því miður ekki til að bera ábyrgð á okkar mikilvægu verkefnum.

Ég ætla ekki að kveðja ykkur núna – við skulum halda áfram að njóta aðventunnar, hún er svo notaleg hér hjá Sjúkratryggingum

Kær kveðja

María