Spilavítishugmyndinni kastað fram en ekki skoðuð nánar

Vísir fjallaði um helgina um grein sem birtist á vef Times Higher Education um starfshóp dómsmálaráðuneytisins sem gera átti tillögur um breytingar á lögum og reglugerðum varðandi happdrætti. Í umfjöllun miðilsins var tekið fram að HHÍ hafi lagt til við starfshóp á vegum dómsmálaráðuneytisins að fá að reka spilavíti á Íslandi og bjóða upp á fjárhættuspil á netinu. 

Í svari við skriflegri fyrirspurn fréttastofu segir Bryndís Hrafnkelsdóttir, forstjóri HHÍ, að það sé ekki rétt að félagið hafi óskað eftir því, heldur einungis hafi HHÍ velt því fyrir sér á fyrri stigum starfsemi starfshópsins til að velta öllum steinum. 

„Hugsunin með spilavíti var sú að ef stjórnvöld hefðu hug á að heimila frekari útvíkkun á happdrættislöggjöfinni, til dæmis með spilavíti, væri núverandi sérleyfishöfum gefinn kostur á að taka þátt til að tryggja að ágóðinn af slíkri starfsemi rynni til samfélagslegra mikilvægra verkefna en ekki til einkarekinna fyrirtækja,“ segir í svari Bryndísar. 

Ein af fjölmörgum hugmyndum

Hugmyndin var ein af fjölmörgum sem HHÍ setti fram en var ekki tekin til umfjöllunar og er ekki í endanlegum tillögum sem sendar voru til dómsmálaráðherra. 

Bryndís bendir á að þrátt fyrir að netspil séu bönnuð á Íslandi hafi ólöglegar erlendar netspilunarsíður starfað hér um langt skeið án afskipta stjórnvalda. Fyrirtækin starfa án lagaheimilda, ekkert eftirlit er með þeim og greiða þau hvorki skatta né gjöld hér á landi. 

„Íslensk stjórnvöld hafa sýnt andvaraleysi með því að aðhafast ekkert til að sporna gegn þessari erlendu ólöglegu netspilun og má færa rök fyrir því að athafnaleysi þeirra sé mesta hættan gagnvart íslenska happdrættismarkaðinum, hvort sem litið er til neytendaverndar eða tekjuöflunar íslensku happdrættisfyrirtækjanna,“ segir í svari Bryndísar. 

Nágrannarnir mættu vera fyrirmyndir

Að mati HHÍ ættu stjórnvöld að líta til nágrannalanda okkar þegar kemur að fjárhættuspilamarkaði. Bryndís segir að það sé skynsamleg leið að stjórnvöld heimili íslensku sérleyfishöfunum að bjóða sín spil á netinu og kveðið verði á með hvaða hætti það gæti orðið. Danir hafa leyft netspil frá árinu 2012, Norðmenn frá árinu 2015 og Svíar frá 2019. 

Rætt hefur verið reglulega um innleiðingu svokallaðra spilakorta. Markmið þeirra er að draga úr spilafíkn og spilavanda en á sama tíma stuðla að heilbrigðari spilahegðun. Kortin leysa þó ekki allan vanda varðandi fíkn og eru gerð til að lágmarka skaða þeirra sem eiga við vanda að etja. 

„Samhliða upptöku spilakorta er mikilvægt að komið verði í veg fyrir starfsemi ólöglegu netspilunarsíðnanna sem starfræktar eru hér á landi. Það yrði til lítils ef ráðist yrði í upptöku spilakorta án fullnægjandi hindrana fyrir ólöglegu netspilunarsíðurnar því spilarar myndu einfaldlega færa sig þangað yfir. Þessi fyrirtæki starfa ólöglega hér á landi, þau leggja ekkert af mörkum til samfélagslega mikilvægra verkefna né til rannsókna á spilavanda eða spilafíkn og til að bæta gráu ofan á svart þá virðast þau ekkert leggja upp úr heilbrigðari spilun eða ábyrgari spilun í starfsemi sinni,“ segir Bryndís.