Þrjár hollar og góðar skálar frá Önnu Eiríks

Hérna eru þrjár hugmyndir að hollum og góðum skálum af heilsuvefnum mínum www.annaeiriks.is en þar er að finna úrval af hollum og góðum uppskriftum sem innihalda engan viðbættan sykur!

Njótið í botn.

Græn próteinskál

Þessa fæ ég mér ótrúlega oft eftir æfingu, mér finnst hún svo fersk, bragðgóð og svo inniheldur hún það sem líkaminn minn þarf eftir góð átök.

Innihald

• 1 bolli ananas
• 1 bolli kókosmjólk eða möndlumjólk
• 1 skammtur vanilluprótein frá NOW
• Væn lúka spínat
• 1/2 lárpera
• Á toppinn setti ég svo heimagert granóla og bláber

Aðferð

Allt sett í blandara, hrært vel saman, hellt í skál og toppað með því sem ykkur þykir gott!

Hafrabomba

Dásamleg skál sem inniheldur haframjöl sem gerir þeytinginn trefjaríkari, gott svo að toppa með allskonar fræjum, berjum, heimagerðu granóla eða því sem ykkur þykir gott.

Innihald

• 1/2 bolli frosin jarðaber
• 1/2 bolli frosin bláber
• 1 bolli möndlumjólk eða önnur mjólk
• 1/2 bolli fínt haframjöl frá MUNA
• 1 lítill banani

Aðferð

Allt sett í blandara og hrært vel saman, hellt í glas eða skál og toppað með því sem ykkur þykir gott, einfaldara gerist það ekki!

Kaldur súkkulaðigrautur

Æðislegur grautur sem ég skelli í á morgnana eða kvöldinu áður og tek oft með mér sem nesti í vinnuna og toppa með allskonar góðgæti rétt áður en ég gæði mér á honum.

Innihald

• 1 dl hafrar frá MUNA
• 1 msk chia fræ frá MUNA
• 2 dl súkkulaði plöntumjólk
• 2 kúfaðar msk grísk jógúrt með súkkulaði og ferskjum
• Smá skvetta Agave síróp eða Akasíu hunang

Aðferð

Öllu blandað saman í lokaða krukku eða annað lokað ílát og geymt yfir nótt í ísskáp. Morguninn eftir er grauturinn tilbúinn og þá er gott að toppa hann með t.d. hindberjum og kakónibbum eða hverju sem ykkur þykir gott!