Hvassviðri, gular viðvaranir og önnur lægð á leiðinni

Atli Ísleifsson skrifar 2. febrúar 2023 07:15

Það hefur bæst í snjóinn á höfuðborgarsvæðinu og er og snjóþekja eða hálkublettir á flestum leiðum í borginni. Vísir/Vilhelm

Útlit er fyrir austan og suðaustan hvassviðri eða storm á landinu í dag. Það verður úrkoma um allt land og víða á formi slyddu eða snjókomu og hiti verður kringum frostmark. Gular viðvaranir hafa þegar tekið eða munu taka gildi á næstu klukkustundum um nær allt land og eru þær í gildi fram á kvöld eða nótt. Einungis höfuðborgarsvæðið er undanskilið hvað viðvaranir Veðurstofu varðar.

Í hugleiðingum veðurfræðings segir að sunnan- og suðvestanlands fari úrkoman yfir í rigningu á láglendi þegar líði á morguninn og hlýni á þeim slóðum. Lesa má um viðvaranir í gildi á vef Veðurstofunnar.

„Það lægir síðan um tíma síðdegis á sunnanverðu landinu, en snýst síðan í allhvassa suðvestanátt með skúrum eða éljum. Heilt yfir má þó segja að það dragi úr vindi og úrkomu á landinu í kvöld og nótt og víða skaplegt veður í fyrramálið. Það stendur þó ekki lengi, því eftir hádegi á morgun gengur í suðaustan og sunnan hvassviðri eða storm með rigningu og hlýindum,“ segir á vef Veðurstofunnar.

Það hefur bæst í snjóinn á höfuðborgarsvæðinu og er og snjóþekja eða hálkublettir á flestum leiðum í borginni. Sömu sögu er að segja af Suðurlandi þar sem er skafrenningur og hvassvirðri þótt enn sem komið er séu flestir vegir færir. Þó er lokað um Krýsuvík.

Á Vesturlandi er Þungfært um Bröttubrekku og í Helgafellssveit og ófært á milli Grundarfjarðar og Ólafsvíkur en lokað er um Fróðárheiði. Þungfært og stórhríð er á Steingrímsfjarðarheiði og Þröskuldum.

Víða eru fjallvegir ófærir og lítið ferðaveður. Annarstaðar á landinu er staðan svipuð og óvissustig víða í gildi sem þýðir að vegum gæti verið lokað með stuttum fyrirvara.

Nánari upplýsingar er að finna á vef Vegagerðarinnar.

Veðurhorfur á landinu næstu daga

Á föstudag: Gengur í suðaustan og síðar sunnan 15-25 m/s, hvassast vestanlands. Víða rigning, talsverð úrkoma á sunnanverðu landinu. Hlýnar, hiti 3 til 9 stig síðdegis.

Á laugardag: Suðvestan 13-20 og él, en þurrt norðaustan- og austanlands. Hiti um og undir frostmarki.

Á sunnudag: Sunnan hvassviðri eða stormur með rigningu og hlýindum, en úrkomulítið norðaustantil á landinu.

Á mánudag: Allhvöss suðvestanátt með éljum og frystir.

Á þriðjudag: Suðvestan stormur með snjókomu eða éljum.

Á miðvikudag: Líkur á að lægð fari yfir landið með breytilegri vindátt og hvössum vindi. Víða úrkoma og hiti kringum frostmark.

Veður