Tímabilið líklega búið hjá Söru Sif

Ágúst Jóhannsson staðfesti við Íþróttadeild Vísis í dag að þarna séu sennilega krossbandameiðsli á ferðinni og því spilar þessi öflugi markvörður líklega ekki handbolta næstu mánuðina.

Sara Sif missir því ekki aðeins af bikarúrslitahelginni, sem hefst með undanúrslitaleik Vals á móti Haukum á morgun, heldur kemur hún til með að missa einnig  af úrslitakeppninni, þar sem Valsliðið er líklegt til afreka.

Valsliðið verður því án aðalmarkvarðar síns þegar úrslitin ráðast í tveimur stærstu keppnum tímabilsins. Þetta er mikið áfall fyrir Valsliðið enda var Sara að spila mjög vel að undanförnu.

Sara Sif meiddist á hné í leik á móti Stjörnunni á Hlíðarenda um síðustu helgi.