Cocoa Puffs ekki að hverfa þrátt fyrir mikla verð­lækkun

Það hefur vakið athygli margra að nú sé hægt að kaupa morgunkornið Cocoa Puffs á einungis 99 krónur í flestum verslunum, að minnsta kosti á höfuðborgarsvæðinu. Auðvitað er um að ræða nýja útgáfu þess sem kom í verslanir í maí á síðasta ári eftir að heilbrigðiseftirlitið bannaði söluna á upprunalegu útgáfunni þar sem uppskrift hennar samræmdist ekki Evrópulöggjöf. 

Í samtali við fréttastofu segir Ágústa Hrund Steinarsdóttir, markaðsstjóri Nathan & Olsen sem flytur inn Cocoa Puffs, að fyrirtækið hafi þurft að skuldbinda sig fyrir ákveðið magn af framleiðslu þegar nýja bragðið var fundið og sett í sölu í maí. 

„Þegar svona á líður þá var þetta mjög mikil skuldbinding. Þannig við eigum það mikið magn sem hefur líftíma til lok apríl byrjun maí. Við vildum bara lágmarka tjónið og auðvitað erum við líka alltaf að hugsa um matarsóunina. Þannig við höfðum samband við alla okkar viðskiptavini og buðum þeim þetta á mjög góðum kjörum til að koma vörunni út svo það þyrfti ekki að henda henni,“ segir Ágústa Hrund.

Það er því allt í lagi með vöruna og er hún ekki á leiðinni úr verslunum. Meira að segja er ný sending á leiðinni.

„Héldum kannski að viðtökurnar yrðu sterkari í byrjun en maður þarf kannski smá tíma til að kynna þessa vöru inn á markað,“ segir Ágústa.

Þá er, mörgum til mikillar gremju, gamla Cocoa Puffs-ið ekki á leiðinni til baka. Á meðan þessi Evrópulöggjöf sem bannar ákveðin efni í því er í gildi þá er ekkert hægt að gera í því. Aðspurð segir Ágústa að margir taki þó vel í nýja bragðið. 

„Þetta er munur og við fórum ekkert í felur með það í byrjun. Við sögðum fólki frá því að þetta væri ekki alveg eins því þetta er önnur uppskrift til að mæta þeim reglum sem gilda á markaðnum. Við vitum til þess að þetta er ágætlega vinsæl vara sem þarf bara að fá tækifæri. Við erum að byggja þetta merki upp áfram og núna vonandi prófa fleiri, kaupa pakka ódýrt og finnast það gott,“ segir Ágústa.