Hjálpuðu geim­verur við smíði lagsins?

Í fyrri umferð kynntumst við flytjendunum sex og heyrðum brot úr fyrstu útgáfum laga þeirra. Nú hefur hópurinn haft góðan tíma til að fínpússa bæði lögin og gera ýmsar breytingar á þeim.

Í þessum þætti er lokaútgáfa Alexanders Orra af SS pylsulaginu kynnt til sögunnar en hann er með skemmtilega dansútgáfu af laginu. Dómnefnd kom m.a. með þá athugasemd að það gæti verið sniðugt að bæta við gítar og jafnvel einhverju fleira.

„Sölku fannst fyrri útgáfa mín vera aðeins of mikil endurtekning og stakk upp á því að ég myndi brjóta lagið meira upp. Ég bætti því inn gítarkafla og strengjum og smá rokkgítar. Síðan vildi ég bara hafa lagið hresst og skemmtilegt, að hafa gott líf í því eins og dómnefndin minntist á. Ég bjó líka til smá fiðlubút og eyðilagði hann í forritinu þannig að útkoman er skrýtinn taktur sem hljómar eins og geimverutæki en er notaður til að fylla inn í lagið.“

Ef Alexander Orri vinnur keppnina segist hann ætla að nota verðlaunaféð í að fjárfesta í fleiri tónlistargræjum. „Þá mun ég kaupa fleiri skemmtileg tæki og tól til að búa til enn meiri tónlist.“

Á næstu dögum verða hinir flytjendurnir fimm kynntir til sögunnar.