Í hugleiðingum veðurfræðings segir að á móti muni hitinn stíga yfir 22 stig allvíða norðaustan og austantil, einkum þar sem hafgola nái ekki að gera sig gildandi enda kæli hún hratt þar sem hafið er lítt farið að hitna og því köld gola sem komi inn, nái hún yfirhöndinni.

Reikna má með austlægari átt á morgun og sums staðar stöku skúrir suðvestantil.

Veðurhorfur á landinu næstu daga

Á miðvikudag: Suðaustlæg eða breytileg átt 3-10 m/s og víða bjart, en þykknar upp með lítilsháttar vætu á Suðvestur- og Vesturlandi. Hiti 12 til 22 stig, hlýjast um landið austanvert.

Á fimmtudag og föstudag: Suðaustlæg eða breytileg átt 3-8 m/s, skýjað með köflum og stöku skúrir. Áfram hlýtt í veðri, einkum austantil.

Á laugardag (lýðveldisdagurinn): Suðlæg átt 3-8 m/s og skýjað, en úrkomulítið um landið vestanvert, annars bjart veður. Hiti 10 til 23 stig, hlýjast á Austurlandi.

Á sunnudag og mánudag: Útlit fyrir suðaustlæga átt, skýjað og víða dálítil væta, síst norðantil. Hiti breytist lítið.