Fangaði augna­blikið þegar veggur hrundi í hraunið: „Stórkostlegt að verða vitni að þessu“

„Það var stór­kost­legt að verða vitni að þessu,“ segir Ísak Finn­boga­son, sem getið hefur sér frægð fyrir mynd­bönd af gosinu sem hann hefur tekið upp á dróna og streymt í beinni út­sendingu á Youtu­be. Hann tók sér sjald­gæfan frí­dag frá streymi í dag, enda skyggnið lítið fyrir gos­móðu.

„Það er svo ó­trú­lega mikið af hlutum sem gerast í gosinu en eru ekki endi­lega hjá sjálfum gígnum og fólk missir svo­lítið af því,“ segir Ísak um augna­blikið þegar hraunáin gleypti vegginn.

„Það er það skemmti­lega við að vera dug­legur að streyma frá svæðinu með drónanum, að manni tekst að skoða allt svæðið, hvert hraunið rennur frá upp­hafi og hvar það síðan endar og þá hvaða at­burðir verða á meðan.“

Fólk fylgist með frá Suður­skauts­landinu

Ó­hætt er að segja að streymið hjá Í­saki hafi slegið í gegn en þetta er ekki í fyrsta skiptið sem Ísak streymir gosi á Reykja­nesi. Hann var líka mættur í fyrra og í hitt í fyrra en mynd­band hans af göngu­görpum á glæ­nýju hrauni í Mera­dölum í fyrra vakti til að mynda mikla at­hygli.

Sjá einnig: Gengu út á hraunið og upp að gígunum

„Ég var ný­kominn heim frá út­löndum þegar það byrjaði að gjósa í þetta skiptið. Ég var mjög stressaður að missa af þessu, þannig að ég var mættur á Reykja­nesið þegar gosið hófst og var líka hérna þegar stóri skjálftinn reið yfir þarna sem var meira en fimm að stærð. Það var mjög ó­hugna­legt.“

Þegar mest var voru rúm­lega 10.500 manns að fylgjast með streyminu hjá Í­saki. Það var fyrsta dag gossins, enda var Ísak einn hina fyrstu sem mætti á svæðið. Ísak segir á­horf­endurna vera frá hinum ýmsu heims­hornum, meðal annars Suður­skauts­landinu.

„Það er fólk úti um allan heim að fylgjast með þessu. Banda­ríkja­mennirnir eru sér­stak­lega dug­legir og þeir eru dug­legir að tjá sig við mynd­böndin. Margir virðast gera sér glaðan dag með fjöl­skyldunni við að horfa á þetta, fólk er að poppa sér popp og fylgjast með þessú í sjón­varpinu,“ segir Ísak.

Hann ræðir sjálfur við á­horf­endur í gegnum streymið og segir á­horf­endur „klukka sig“ um leið og hann hætti að tala. Fólk kunni að meta að fá lýsingar heima­manns af gosinu.

„Um leið og ég hætti að tala þá spyr fólk: „Hvar er Ísak?!,“ segir hann hlæjandi. Hann viður­kennir að þetta hafi verið mikil keyrsla, enda Ísak einungis búinn að taka sér tvo daga í frí.

Að­stoðar björgunar­sveitir og lög­reglu

„Þetta hefur tekið á en er ó­trú­lega gefandi, sér­stak­lega í ljósi þess að ég hef verið að að­stoða björgunar­sveitir og lög­reglu við gosið. Degi eftir að gosið byrjaði upp­götvuðu tveir björgunar­sveitar­menn að ég hefði yfir­sýn yfir svæðið með drónanum þrátt fyrir mengunina og ég gat bent þeim á hvar fólk væri við gíginn. Síðan þá hafa þeir fylgst með mér hjá við­bragð­steymi al­manna­varna og ég hef verið á „stand by“ ef svo má segja.“

Ísak ætlar að vera aftur með streymi á Youtu­be á morgun. Hann segir að þetta henti sér vel, enda safni hann sjálfur ó­grynni af efni með því að taka gosið svo gaum­gæfi­lega upp með dróna.