„Farðu vel með það sem þú átt frekar en að kaupa meira og meira”

Matthildur er alin upp í Ólafsvík en sótti háskólanám í Flórens á Ítalíu þar sem hún bjó um árabil og lærði að meta ítalskt handverk af ýmsu tagi. Matthildur segist ávallt hafa sótt í tengingu við sköpun og borið ómælda virðingu fyrir þeim sem búa til verðmæti. Hún vilji þess vegna leggja áherslu á að virða störf þeirra sem koma að framleiðslu varanna sem hún selur.

„Við þurfum að huga að framleiðsluferlinu á fatnaðinum sem við kaupum. Ef við tökum dæmi um gallabuxur, þá gleymum við oft að það þarf að rækta bómulinn, vökva akurinn, uppskera, vefa efnið, sníða, klippa, sauma, pakka, flytja á milli landa og selja. Ef þú borgar einungis örfá þúsund fyrir buxurnar er ljóst að einhvers staðar er skekkja.”

30 ár á sömu kennitölu

Ofneysla er Matthildi ofarlega í huga og hún leggur áherslu á að fatnaður og skór eigi sér framhaldslíf. Hún fagnar loppuverslununum þar sem hægt er að kaupa og selja notaðan fatnað og telur þess vegna að gæðavörur eigi mikla framtíð fyrir sér.

„Ég fagna því að fólk sé að vakna upp og þetta hagkerfi sem selur notað er æðislegt. Fólk áttar sig líka betur á að handverk kostar. Keyptu frekar eitt vandað par af skóm einu sinni á ári. Farðu vel með það sem þú átt frekar en að kaupa meira og meira. Það er mannfólkinu eðlilegt að skreyta sig, skapa sinn eigin stíl og það getur fólk svo sannarlega gert með bæði nýjar og notaðar vörur.“

Í dag verður afmælishátíð í húsnæði 38 þrepa á Laugavegi 49, steinhúsinu sem kallað er Ljónið.

„Við fögnum í dag og bjóðum alla velkomna til okkar. Það verða léttar veitingar, plötusnúður og í tilefni afmælisins erum við líka afar stoltar að kynna nýtt gjafavörumerki, Santa Maria Novella, frá fyrirtæki sem hefur verið starfrækt í Flórens frá árinu 1221 og rekur upphaf sitt til munkaklausturs.“

Aðspurð að því hver lykillinn sé við það að halda sjó í allan þennan tíma á sömu kennitölu, með sama starfsfólki og jafnvel með sömu innréttingu segir Matthildur að það geri maður ekki einn.

„Stoltust er ég af starfsfólki mínu sem hefur fylgt mér alla tíð og viðskiptavinunum sem hafa verið bæði skemmtilegir og gefandi. Það sem er líka áhugavert er að uppkomin börn viðskiptavinanna eru að koma inn sem næsta kynslóð viðskiptavina. Það gefur okkur alveg ótrúlega mikið og segir okkur að við séum að gera eitthvað rétt.”