Sagði launaþak bestu lausnina fyrir kvennafótboltann

Efstu tvær deildirnar á Englandi, Women's Super League og Women's Championship, hafa þá launastefnu að lið megi eyða allt að 40% af veltu sinni í launakostnað. 

WSL deildin var stofnuð árið 2011 og fjögur lið hafa hampað titlinum frá stofnun hennar; Chelsea, Arsenal, Liverpool og Manchester City. 

Steve Parish heldur því fram að vegna ósamræmis í launagreiðslum sé hætta á að stærstu liðin muni ráða öllum ríkjum í kvennafótboltanum.  

Hann tjáði sig um málið á Leaders in Sport ráðstefnunni sem fer fram í London á dögunum. Þar sagði Steve að eina leiðin til þess að jafna leikvöllinn væri að koma á kostnaðareftirliti og launaþaki. Þrátt fyrir núgildandi reglur væru í raun ekkert sem bannaði það að eyða stórum fjárhæðum í launakostnað, svo lengi sem hann yrði ekki meiri en 40% af veltu félagsins. 

Félög út um allan heim, ekki síst á Englandi, hafa leitað leiða til þess að auka veltu sína á blaði í þeim tilgangi að smeygja framhjá slíkum regluverkum og því telur Parish launaþak bestu lausnina, það er, ákveðin föst upphæð sem eyða má í laun og sama upphæð gengur yfir öll lið deildarinnar líkt og þekkist úr bandarískum íþróttum.