For­sætis­ráð­herra Ítalíu skilinn í kjöl­far um­deildra um­mæla eigin­mannsins

„Samband mitt við Andra Giambruno, sem entist í tíu ár, er hér með lokið,“ segir Meloni. „Leiðir okkar höfðu skilið fyrir einhverju síðan og það vor kominn tími á að horfast í augu við það,“

Giambruno er sjónvarpsmaður, en undanfarið hefur hann verið milli tannanna á fólki í Ítalíu vegna ummæla sem hann hefur látið falla um kvenfólk og eru að margra mati óviðeigandi.

Um er að ræða tvenn ummæli sem fjölmiðillinn Mediaset, þar sem Giambruno starfar, birti í vikunni. En orðin sem hann er gagnrýndur fyrir sagði hann við kvenkyns kollega sína þegar hann var ekki í loftinu.

„Hvers vegna hef ég ekki hitt þig fyrr?“ sagði hann við samstarfskonu sína og þótti þar með reyna við hana óviðeigandi hátt.

CNN fullyrðir að hin ummæli hans hafi þó verið umdeildari. Þar montar hann sig á því að stunda framhjáhald og sagði við kvenkyns kollega að þær gætu unnið fyrir hann væru þær tilbúnar að stunda hópkynlíf.

Áður hafa ummæli Giambruno komist í sviðsljósið á Ítalíu. Meloni var spurð út í einhver þeirra fyrr á þessu ári en þá hélt hún því fram að ekki væri rætt að dæma hana fyrir ummæli maka síns. Jafnframt sagðist hún ekki ætla að svara fyrir orð hans framar.