Ljósleiðaradeildin: Þórsarar lögðu ÍA eftir að lenda undir

Snorri Már Vagnsson skrifar 2. nóvember 2023 21:45

Þór lagði ÍA í Ljósleiðaradeildinni en þar er keppt í skotleiknum Counter-Strike: Global Offensive. Þór og ÍA mættust á Overpass og byrjuðu Þórsarar í vörn.

ÍA hófu leikinn einkum vel í sókninni og sigruðu fyrstu fimm lotur leiksins áður en Þórsarar fengu loks sína fyrstu lotu. ÍA-menn stöðvuðu þó ekki við mótlæti en TripleG, leikmaður ÍA skoraði ás og felldi alla mótherja sína í einni lotu eftir meistaralega frammistöðu; staðan þá 1-6.

Fyrri hálfleikur tók þó skarpa beygju og Þórsarar jöfnuðu leikinn í fjórtándu lotu, staðan þá orðin 7-7. Þórsarar sigruðu síðustu lotu hálfleiksins og fóru inn í hálfleik með forystuna.

Staðan í hálfleik: 8-7

Þórsarar héldu uppteknum hætti í seinni hálfleik og hleyptu ÍA aldrei framúr sér. ÍA sigurðu aðeins tvær lotur til viðbótar en höfðu einfaldlega engin svör við sókn Þórsara sem tryggðu sér sigurinn eftir þægilegan seinni hálfleik.

Lokatölur: 18-9

Þór fer því á topp deildarinnar tímabundið hið minnsta, með 14 stig. ÍA eru enn í áttunda sæti deildarinnar með 4 stig, jafnir Breiðablik.

Rafíþróttir Ljósleiðaradeildin