Skjálfta­virkni minnkað en búist við að hún aukist aftur

Áfram mælist landris á svæðinu og ekkert bendir til þess að kvikan, sem er á um fjögurra kílómetra dýpi, sé farin að grynnka. Lovísa Mjöll Guðmundsdóttir, náttúruvársérfræðingur hjá Veðurstofu Íslands segir að þrátt fyrir að skjálftarnir séu nú minni en áður hafi tilkynningar borist í nótt um að jarðskjálftar hafi fundist.

„Þetta er svona við að búast. Virknin rokkar töluvert upp og niður. Þannig að það má alveg búast við að hún aukist aftur,“ segir Lovísa í samtali við fréttastofu.

Síðustu 12 klst. hafa um 900 skjálftar mælst, allir undir þremur að stærð. Virknin eftir miðnætti hefur aðallega verið við Sundhnúkagígaröðina, norðaustan af Þorbirni og einnig vestan Eldvarpa.

Veðurstofan fundaði með Almannavörnum í gærkvöldi. Þar kom fram að gera megi ráð fyrir gikkskjálftavirkni á næstu dögum vegna kvikuinnskotsins. Á meðan að sú kvikusöfnum heldur áfram má gera ráð fyrir skjálftavirkni vegna þess að kvikuinnskotið veldur aukinni spennu á svæðinu.

Þá er fólk hvatt til að fara varlega nærri fjallshlíðum á svæðinu af hættu við grjóthrun.