Olíu­fé­lögin fjar­lægjast Costco

Dýrasti bensínlítrinn á höfuðborgarsvæðinu fæst á um það bil 327 krónur en ódýrasta bensínið hefur alla jafna mátt finna á bensínstöð Costco. Þú þarft þó að vera Costco meðlimur til að taka þar bensín.

Aukist um fjórtán krónur á einu ári

Afsláttarstöðvar bensínstöðvanna hafa haldið í við Costco síðustu ár þegar kemur að því að halda bensínverðinu lágu. Munurinn hefur þó aukist upp á síðkastið og er nú tæpar fimmtán krónur samkvæmt gögnum frá Gasvaktinni.

Í byrjun síðasta árs munaði tæpri krónu á verði ódýrustu afsláttarstöðvarinnar og Costco. Saman hækkuðu allar bensínstöðvarnar verðið í byrjun þess árs og náði verðið hámarki í júlí en rætt hefur verið um að innrás Rússa í Úkraínu í febrúar í fyrra hafi valdið þessari hækkun á þessu tímabili. Munurinn milli Costco og ódýrustu afsláttarstöðvarinnar var þá tæpar fimm krónur.

Síðan fór verðið á bensínlítranum að lækka hjá öllum stöðvum. Í nóvember á síðasta ári verða hins vegar einhver skil milli stöðvanna og fer munurinn úr tveimur krónum í átta krónur. Munurinn hefur síðan haldið áfram að aukast á þessu ári, farið í tíu krónur, tólf og er nú í nýjum hæðum, tæpar fimmtán krónur. 

Landsbyggðin í verri málum

En hvað gæti skýrt þessa aukningu? Runólfur Ólafsson, framkvæmdastjóri Félags íslenskra bifreiðaeigenda, segir að mögulega sé það skortur á samkeppni á markaðinum. 

„Hin félögin hafa auðvitað sömu burði til þess að lækka. Þau hafa verið að fjölga þessum lággjaldastöðvum sínum en eftir sem áður erum við með stóran hluta landsins sem ekki býður nema upp á hæstu verð. Og þá er munurinn miklu meira en fimmtán krónur, þá getur hann verið fimmtíu krónur,“ segir Runólfur. 

Hann segir bensínverð ekki á niðurleið á komandi árum.

„Stjórnvöld eru með áform um að hækka skatta á eldsneyti um komandi áramót. Þannig það á ekki að hætta heldur halda áfram á meðan nágrannalöndin stefna í aðrar áttir, til dæmis til að sporna gegn verðbólgu,“ segir Runólfur.