Nýtt gjald hefur á­hrif á ís­lenska selj­endur

Á morgun, sunnudaginn 1. nóvember, tekur ný reglugerð Evrópusambandsins gildi sem kveður á um tveggja evra gjald á allar vörutegundir sem koma frá fyrirtækjum utan ESB.

Gjaldið, sem jafngildir 272 krónum, leggst einnig á vörur sem koma frá EES-löndum og hefur áhrif á íslensk fyrirtæki sem senda vörur til Evrópusambandsins.

Íslandspóstur vakti athygli á gjaldinu fyrr í vikunni. Þar segir að tollvinnslugjaldið sé gjald sem tollurinn í móttökulandi fær.

Þetta gjald bætist við þriggja evra bráðabirgðagjald (408 krónur) sem tók gildi 1. júlí og lagðist á allar smærri vörusendingar að verðmæti allt að 150 evrum. Gjaldið sem tók gildi í sumar var bráðabirgðalausn til ársins 2028 þar sem unnið er að breytingum á tollakerfi ESB, en innflutningur á smápökkum í ESB hefur dregist saman um 60 prósent frá því að gjaldið tók gildi í byrjun júlí 2026.

Nýja gjaldið er aftur á móti varanlegt og óháð kostnaði vörunnar. Gjöldunum er ætlað að stemma stigu við smápakkainnflutningi frá Kína Einnig á gjaldið að standa undir kostnaði við tollafgreiðslu á vörunum.

Íbúar ESB fluttu inn tæplega sex milljarða smávara í fyrra og þar af komu rúm 90 prósent frá Kína, einkum frá sölusíðunum Temu og Shein að því er fram kemur í umfjöllun Euro News.

Framkvæmdastjórn Evrópusambandsins hefur reynt að stemma stigu við innflutningi frá Kína þar sem seljendur innan Evrópusambandsins eiga erfitt með að keppa við verð kínverskra samkeppnisaðila.

Í frétt írska ríkisútvarpsins kemur fram að tveggja evra gjald sé lagt á fyrir hverja vörutegund í sendingunni. Til dæmis leggst gjaldið aðeins einu sinni á sendingu sem inniheldur tíu stuttermaboli en tvisvar á sendingu með tíu stuttermabolum og tveimur húfum.

Evrópusambandið hefur sagt að gjaldið muni ekki leggjast á neytendur í sambandinu, heldur greiði seljendur gjaldið, þótt mögulegt sé fyrir þá að velta kostnaðinum í verðlagið.