Vals­menn halda á­fram að safna liði og sækja Selfyssing til Fulham

Varnarmaðurinn Þorsteinn Aron skrifar undir samning sem gildir út tímabilið 2026 og mun því að öllum líkindum leika með Valsmönnum næstu þrjú tímabil í það minnsta. Hann kemur til félagsins frá enska félaginu Fulham, en hann var á láni hjá uppeldisfélagi sínu, Selfossi, á síðasta tímabili.

Þessi 19 ára gamli varnarmaður lék sinn fyrsta meistaraflokksleik árið 2020. Alls hefur hann spilað 49 leiki á meistaraflokksferli sínum og skorað í þeim fjögur mörk. Þá á hann að baki 18 leiki fyrir yngri landslið Íslands þar sem hann hefur skorað eitt mark.

Þorsteinn er þriðji leikmaðurinn sem Valsmenn kynna til leiks í vikunni, en í gær var greint frá því að félagið hafi fengið þá Bjarna Guðjón Brynjólfsson frá Þór Akureyri og Gísla Laxdal Unnarsson frá ÍA.