Enski boltinn

Man. City setur upp styttu af Bell, Lee og Sum­mer­bee fyrir utan leik­vanginn

Óskar Ófeigur Jónsson skrifar
Colin Bell, Francis Lee og Mike Summerbee voru allir í stórum hlutverkum hjá Manchester City á áttunda áratugnum.
Colin Bell, Francis Lee og Mike Summerbee voru allir í stórum hlutverkum hjá Manchester City á áttunda áratugnum. Getty/ PA Images

Þrjár goðsagnir úr sögu Manchester City fá af sér styttu fyrir utan Etihad leikvanginn og hún verður vígð á þriðjudaginn kemur.

Leikmennirnir þrír eru Colin Bell, Francis Lee og Mike Summerbee.

Myndhöggvarinn David Williams-Ellis fékk það verkefni að minnast áranna frá 1968 til 1976 þegar City vann ensku deildina, enska bikarinn, enska deildarbikarinn tvisvar og Evrópukeppni bikarhafa.

Bell, Lee og Summerbee voru lykilmenn á þessum árum og voru saman með 368 mörk í 1277 leikjum fyrir félagið.

Bell er fimmti leikjahæstur í sögu Manchester City en Summerbee er í áttunda sætinu. Bell er líka fjórði markahæstur og Lee er í sjöunda sæti á markalista leikmanna City.

Bell lést 74 ára gamall árið 2021 en hinn 79 ára gamli Lee lést í síðasta mánuði. Summerbee heldur upp á 81 árs afmælið sitt fimmtánda desember næstkomandi.

Áður höfðu Vincent Kompany, David Silva og Sergio Aguero fengið af sér styttur fyrir utan Etihad leikvanginn.

Enski boltinn

Mest lesið


Fleiri fréttir

Sjá meira


×

Mest lesið