Tíu mínútur í kælingu fyrir kjaft­brúk eða taktísk brot

Í leit að lausn við taktískum brotum og munnsöfnuðu leikmanna íhugar enska úrvalsdeildin nú að senda leikmenn í „skammarkrókinn.“ Í stað þess að fá gult spjald verða leikmenn sendir af velli í tíu mínútur.

Á fundi deildarinnar á þriðjudag var ákveðið að taka upp regluverk sem við Íslendingar könnumst við úr handbolta, þar eru leikmenn sendir af velli í tvær mínútur en þar sem knattspyrnuleikur er töluvert verri yrðu leikmenn sendir af velli í 10 mínútur.

Í grein The Telegraph segir að „skammarkrókurinn“ hafi virkað til að minnka munnsöfnuð hjá yngri aldursflokkum á Englandi og nú sé planið að gera slíkt hið sama í úrvalsdeildinni. Þá munu leikmenn hljóta sömu refsingu fyrir taktísk brot. Gæti farið svo að appelsínugult spjald verði kynnt til leiks fyrir brot af þessu tagi.

Í fréttinni kemur einnig fram að til að sporna við því að leikmenn umkringi dómarann þá munu aðeins fyrirliðar liða fá að ræða ákvarðanir dómara við manninn sem valdið hefur.