Myndir: Einar með húfu og Skíta­mórall á fyrstu æfingu

Strákarnir mættu með hátalara á fullum styrk inn á keppnisgólfið í Ólympíuhöllinni, og tónlistin sem varð fyrir valinu var að stórum hluta úr smiðju Skítamórals og fleiri fornfrægra sveitaballahljómsveita.

Hornamaðurinn Bjarki Már Elísson mun vera sá sem hefur yfirráð yfir tónlistinni en þjálfarinn Snorri Steinn Guðjónsson fær víst ekkert að skipta sér af og leyfir ákveðinn léttleika, ekki síst þegar langt og strangt mót gæti vonandi verið fram undan.

Snorri er líka með þá reglu að í upphitun, þegar samkvæmt gamalli hefð er spilaður léttur fótbolti, þurfi sá sem var lakastur í fótboltanum á síðustu æfingu að vera með húfu á hausnum. Í þetta sinn var það Einar Þorsteinn Ólafsson sem bar húfuna eftir að hafa tapað í spennandi úrslitaeinvígi við Viktor Gísla Hallgrímsson í gærkvöld.

Eftir mínúturnar tíu sem opnar voru fjölmiðlum tók hins vegar meiri alvara við. Spennan fer nefnilega stigmagnandi vegna leiksins við Serba sem hefst klukkan 17 á morgun að íslenskum tíma, eða klukkan 18 í Þýskalandi.

Eini leikmaðurinn sem missti af æfingunni í dag er Viktor Gísli sem glímir við minni háttar veikindi. Hann varð eftir á hótelinu til öryggis en fastlega er búist við því að hann verði með á morgun.

Vilhelm Gunnarsson ljósmyndari var á hliðarlínunni í byrjun æfingar í dag og smellti af meðfylgjandi myndum.

Fyrsti leikur Íslands á EM er við Serbíu á morgun klukkan 17. Íþróttadeild Sýnar er í München og mun fjalla ítarlega um allt sem tengist leiknum í máli og myndum.