„Ég er ekki búinn að sjá planið hjá Snorra“

Sérfræðingarnir í hlaðvarpinu Besta sætið á Vísi ræddu aðeins skipulagið og hlutverkaskipan hjá landsliðsþjálfaranum. Besta sætið mun fara yfir hvern einasta leik íslenska liðsins á EM 2024 og nú er kominn inn þátturinn um leikinn á móti Svartfjallalandi í gær.

„Ég held að þetta snúist svolítið um það hvað sé planið hjá Snorra. Hvað sé hlutverk hvers og eins í liðinu,“ sagði Einar Jónsson.

„Þú sem þjálfari verður að taka þess ábyrgð. Þú verður að vera búinn að sjá fyrir þér liðið, hvernig þú ætlar að rótera leikmönnum og á hverja þú ætlar að veðja. Þú bara trúir og treystir á það og fellur með því líka,“ sagði Bjarni Fritzson.

„Ég er ekki búinn að sjá planið hjá Snorra. Hvernig er róteringin og hvaða hlutverk hver og einn hefur. Mér finnst Snorri enn þá vera að þreifa sig áfram með það sem er kannski bara eðlilegt. Hann er nýtekinn við þessu liði og við erum með rosalega marga góða leikmenn,“ sagði Einar.

„Mikil pressa í þessum tveimur leikjum,“ skaut Bjarni inn í.

„Algjörlega. Við eigum eftir að sjá þetta betur þegar fer aðeins að líða á þetta þá. Bjarni þú talaðir um að leikmenn þyrfti nokkur stórmót til þess að verða landsliðsmenn. Þótt að Snorri sé með gríðarlega reynslu og sé ótrúlega fær þjálfari þá er hann á sínu fyrsta stórmóti. Það er hluti af pakkanum líka,“ sagði Einar.

Þáttinn má heyra í spilaranum að ofan. Besta sætið er aðgengilegt á öllum helstu hlaðvarpsveitum, t.a.m. á Spotify hér. Hver einasti leikur Íslands á EM verður gerður upp af sérfræðingum í Besta sætinu.