Sakar Um­hverfis­stofnun um stæka karl­rembu

Eiður Gísli Guðmundsson hreindýraleiðsögðumaður er ómyrkur í máli þegar við hann er rætt um þessi mál. Svo ósáttur er Eiður Gísli með hvernig staðið er að málum að hann er að spá í að skila inn leyfi sínu í sumar.

„Sem þýðir að svæði 7 fer í fokk,“ segir Eiður Gísli en í fyrra fór hann með 70 menn til veiða á því svæði.

Tvær færar konur komust ekki inn

Eina leiðin til að fá hreindýraleiðsögumannsleyfi er að fara í gegnum téð námskeið sem hefur verið notað til að stemma stigu við ásókn í starfið og hafa skikk á leiðsögumannastóðinu. Nú sóttu 99 manns um að fá að fara á námskeiðið en aðeins þrjátíu eru teknir inn og ekki þeir hæfustu, að því er hermt.

Meðal þess sem Eiður Gísli vill gagnrýna er meint kvenfyrirlitning Umhverfisstofnunar en honum er kunnugt um tvær konur sem sóttu um en fengu ekki að fara á námskeiðið. Eiður Gísli hefur verið leiðsögumaður frá árinu 2011. Hann vill meina að lítil innstæða sé fyrir tali þar sem konur eru hvattar til að sækja um.

„Nú sóttu tvær konur um og önnur er kona mína sem heitir Bergþóra Valgeirsdóttir. Hin heitir Guðný Gréta Eyþórsdóttir. Báðum synjað á þeim forsendum að þær hefðu ekki næga reynslu eða þekkingu á staðháttum.“

Þetta segir Eiður Gísli ekki fá staðist, Bergþóra hafi veitt fjögur dýr og farið oft með honum til veiða. Og hún hafi starfað í sláturhúsi við fláningu á hreindýrum. Guðný Gréta hafi svo tvívegis unnið Hreindýrahreysti sem er keppni sem haldin er reglulega. Þar hafi hún lagt reynda leiðsögumenn.

Hobbímenn að sunnan í staðinn fyrir unga heimamenn

Eiður Gísli rekur þetta til þess að þær eru konur, aðrar skýringar haldi ekki. Og honum finnst hreinlega, á tímum jafnréttisbaráttu að þær ættu að vera sjálfkjörnar á námskeiðið.

Þá vill Eiður Gísli halda því fram að ekki komist þeir hæfustu að auk þess sem upphaflega hugmyndin hafi verið sú að hreindýraleiðsöguleyfin ættu að auka atvinnustig fyrir austan. Þetta var upphaflega hugsað fyrir bændur. En hann viti um fjölmarga unga heimamenn sem ekki komust inn, svo sem Aðalsteinn Sigurðsson – Alli Tarfur – frá Vaðbrekku.

„Ég get staðið fastur á því að ekki voru valdir þeir hæfustu. Grjótharðir menn hafðir úti í kuldanum. Umhverfisstofnun telur sig hafa vit á þessu en tekur handahófskennt inn á námskeiðin, „helgarpabba“ svokallaða, einhverja hobbímenn, sem ekki eru búsettir fyrir austan. Og það fyrsta sem þeir gera þegar þeir koma austur er að hringja í mig og spyrja hvar dýrin séu?“