Flutti kókaínið og keta­mínið inn­vortis og í fatnaði

Konan var ákærð fyrir stórfellt fíkniefnalagabrot, en hún flutti efnin til landsins með flugi frá Amsterdam í Hollandi í desember síðastliðinn. Var um að ræða tæp 300 grömm af kókaíni og rúm 600 grömm af ketamíni sem hún hafði falið innvortis og í fatnaði sem hún klæddist.

Konan játaði brot sitt afdráttarlaust fyrir dómi. Í dómi kemur fram að af fyrirliggjandi gögnum verði ekki ráðið að konan hafi verið eigandi efnanna eða tekið þátt í skipulagningu á kaupum og innflutningi þeirra til Íslands. Hennar hlutverk hafi einvörðungu verið fólgið í því að koma efnunum hingað til lands og fá þau öðrum í hendur.

Við ákvörðun refsingar var litið til þessa og sömuleiðis að hún hafi verið samvinnufús við rannsókn málsins og gert sér far um að upplýsa um aðild annarra að málinu. Mat dómari í málinu hæfilega refsingu vera fjórtán mánaða fangelsi, en til frádráttar kemur gæsluvarðhald sem hún hafði setið í frá komunni til landsins.

Konunni var jafnframt gert að greiða þóknun og önnur gjöld til skipaðs verjanda, auk sakarkostnað, samtals rúmar tvær milljónir króna.