Katrín minni á Ólaf Ragnar árið 2012

Katrín Jakobsdóttir forsætisráðherra mælist með 33 prósenta fylgi samkvæmt könnuninni, sem er mest allra, en Baldur er með 27 prósenta fylgi og Jón með tuttugu prósent. Álíka fylgi dugði Vígdísi Finnbogadóttur, en Guðni Th. Jóhannesson og Ólafur Ragnar Grímsson fengu meira þegar þeir voru fyrst kjörnir í embætti forseta.

„Það er alltaf gott að vera efstur. En það sem kannski slær mann helst er að þarna er veruleg dreifing. Og þó að Katrín sé efst, þá er hún ekki nema með þriðjung atkvæðanna. Þriðjungur dugði Vigdísi til að vera kosin 1980, en bæði 1996 og 2016 fengu Ólafur og Guðni um og yfir fjörutíu prósent atkvæðanna. Þannig að 33 prósent, ef það yrði nú niðurstaðan, hvort að það nægi ræðst af dreifungu atkvæða á milli hinna frambjóðendanna,“ sagði Ólafur í kvöldfréttum Stöðvar 2 í kvöld.

„Það sem áhugaverðast er fyrir minn hatt er hvernig fylgið skiptist eftir stjórnmálaskoðunum. Sérstaklega áhugavert er að velta fyrir fylgisprófil Katrínar Jakobsdóttur, sem hefur verið leiðtogi vinstri sósíalista. Það kemur ekki óvart að hún er með yfir níutíu prósenta fylgi hjá félögum sínum í VG,“ segir Ólafur.

„En þeir flokkar sem næst koma eru hinir stjórnarflokkarnir. 44 prósent Sjálfstæðismanna ætla að kjósa vinstri sósíalistann. 42 prósent Framsóknarmanna ætla að kjósa vinstri sósíalistann. Fylgi við Katrínu er heldur minna hjá bæði kjósendum Viðreisnar og Samfylkingarinnar, en þó prýðilegt. En það eru hinir flokkarinar: Flokkur fólksins, Píratarnir, og Sósíalistaflokkurinn – flokkarnir sem eru kannski lengst til vinstri, sem hafa minnsta trú á forsætisráðherranum og sósíalistanum Katrínu Jakobsdóttur.“

Katrín minni á Ólaf

Það séu gjarnar þeir sem eldri eru og hægri sinnaðir sem vilji Katrínu sem forseta. Ólafur segir þennan prófíl Katrínar minna að miklu leyti á Ólaf Ragnar Grímsson. „Ekki 1996, því þá voru það vinstri menn sem kusu hann, heldur 2012 eftir Icesave. Þegar það voru hægri menn sem kusu þennan fyrrverandi foringja Alþýðubandalagsins.“

Á einhver annar möguleika en þessir sem eru núna efstir á blaði?

„Það finnst mér afar ólíklegt,“ segir Ólafur, en tekur fram að Halla Hrund hafi ekki verið búin, eða í þann mund að tilkynna framboð þegar könnunin var gerð. „En ég sé engan af þessum sem er með innan við fimm prósent vera líklegan til að hoppa upp, eins og reyndar Halla Tómasdóttir gerði 2016. Hún fór úr tveimur prósentum í 28 á tveimur mánuðum. Það er mjög óvenjulegt.“

Ólafur segir líklegast að baráttan verði milli Katrínar, Baldurs og Jóns Gnarr. „Einhver af þessum sem koma þarna næst á eftir gætu hugsanlega blandað sér í baráttuna. Auðvitað er ekkert útilokað að einhver spútnik komi, en það er ekkert sérstaklega líklegt.“