Síðasti hvalkjötsfarmur skilaði 2,8 milljarða gjald­eyris­tekjum

Leiða má líkur að því að afurðir eftir skammvinna vertíð síðastliðið haust séu of litlar til að standa undir kostnaði við heilt frystiskip yfir hálfan hnöttinn. Þá veiddust 24 hvalir en vertíðin í fyrra hófst ekki fyrr en í fyrstu viku septembermánaðar þegar langt var liðið á hefðbundinn veiðitíma. Vertíðin sumarið á undan skilaði 148 langreyðum á land.

Sem frægt er orðið kom þáverandi matvælaráðherra, Svandís Svavarsdóttir, í veg fyrir að Hvalur hf. næði að veiða útgefinn kvóta síðasta árs með því að fresta upphafi hvalveiða með reglugerð. Umboðsmaður Alþingis komst síðar að þeirri niðurstöðu að reglugerðina hefði skort lagastoð.

Síðasti skipsfarmur af hvalafurðum fór úr landi í Hafnarfirði rétt fyrir jólin 2022 með norska frystiskipinu Silver Copenhagen. Skipið var 49 daga á leið sinni og virðist siglingin hafa gengið vandræðalaust en skipið kom í höfn í Japan þann 8. febrúar.

Samkvæmt útflutningstölum Hagstofu Íslands var farmurinn alls 2.576 tonn af hvalkjöti og nam útflutningsverðmætið, fob-verð, 2.771 milljón króna. Það þýðir 1.076 króna meðalverð á hvert kíló en telja má nokkuð víst að hluti farmsins hafi verið eldri birgðir.

Til samanburðar má geta þess að verðið fyrir hvalkjötið var svipað og fékkst um sama leyti fyrir ferskan íslenskan eldislax á mörkuðum í Evrópu. Þá nam meðalverð á útfluttum ferskum laxi til Frakklands 1.043 krónum á kíló en verð á laxi hafði verið mjög hátt.

Þá er þetta einnig svipað verð og fékkst fyrir landfryst þorskflök í blokkum í Bretlandi um líkt leyti. Þar var meðalverð á kíló 1.042 krónur, samkvæmt tölum Hagstofunnar. Þorskverð hafði sömuleiðis verið í hæstu hæðum.

Hvalverndarsamtök kvikmynduðu löndun íslenska hvalkjötsins í Japan í fyrra. Á sama tíma var íslenskt kvikmyndatökulið að taka upp kvikmynd á sömu slóðum, eins og sjá mátti í frétt Stöðvar 2: