Stuðnings­menn Roma söfnuðu fyrir sekt vegna rottufánans

Mancini skoraði eina mark leiksins þegar Roma og Lazio mættust í ítölsku úrvalsdeildinni á laugardaginn.

Eftir leikinn ákvað Mancini að strá salti í sár Lazio-manna. Hann fagnaði sigrinum nefnilega með því að veifa fána í litum Lazio (bláum og hvítum) með mynd af rottu á.

Fyrir það fékk ítalski landsliðsmaðurinn fimm þúsund evra sekt. Það jafngildir 754 þúsund íslenskra króna.

Stuðningsmaður Roma, Lorenzo Contucci, stofnaði í kjölfarið Go Fund Me síðu til að safna fyrir sektinni. Og það tók ekki langan tíma. Sólarhring eftir að söfnunin var sett á laggirnar höfðu safnast 5900 evrur. Ef Mancini þiggur ekki upphæðina rennur hún til góðgerðamála.

Roma er í 5. sæti ítölsku úrvalsdeildarinnar en liðinu hefur gengið allt í haginn eftir að Daniele De Rossi tók við því af José Mourinho.