Heyrt kjafta­sögurnar um eldri mennina sem stýri henni

Þetta er meðal þess sem fram kemur í Einkalífinu á Vísi þar sem Kristrún er gestur. Þar fer Kristrún yfir víðan völl, ræðir æskuna í Fossvoginum, árin sem hún lærði spænsku í San Sebastián og kynntist fyrstu ástinni. Þá lýsir hún fyrstu kynnum sínum af eiginmanni sínum og því hvernig hefur tekist að samþætta fjölskyldulífið með þingmanns- og formannsstörfunum.

Hægt er að horfa á þáttinn hér fyrir neðan. Hann er einnig að finna á helstu hlaðvarpsveitum.

Ræðir við fólk þvert á flokka

Kristrún ræðir líka sínar helstu fyrirmyndir í stjórnmálum. Þar nefnir hún félaga sína sem eru formenn jafnaðarflokkanna á Norðurlöndum en líka gamla formenn Samfylkingarinnar líkt og Margréti Frímannsdóttur, Össur Skarphéðinsson og Ingibjörgu Sólrúnu Gísladóttur.

Hún svarar líka spurningum um vinskap sinn við Ólaf Ragnar Grímsson fyrrverandi forseta Íslands. Hún segir þeim vel til vina, þau hafi kynnst í gegnum Arctic Circle á sínum tíma. Hún bendir á að hún tali líka við Guðna Th. Jóhannesson núverandi forseta og miklu fleiri.

„Ég tala alveg við Ólaf Ragnar en ég tala líka við Guðna og allskonar fólk og þvert á stjórnmálaflokka. En ég hef alveg heyrt þessar sögur, að það sé einhver á bakvið mig og þetta eiga aðallega að vera eldri karlmenn sem eru að stýra mér. Það þykir rosalega vinsæl kenning, sem er auðvitað bara hlægilegt,“ segir Kristrún.

„Ég auðvitað leita mér ráða hjá reynslumiklu fólki en það er alveg þvert á hið pólitíska landslag og það er líka bara þvert á aldur, og kyn og reynslu og allt þetta. Þú auðvitað bara tekur inn allskonar upplýsingar en í lok dags þá tekur maður ákvörðun sjálfur á eigin forsendum.“

Hægt er að horfa á þáttinn á sjónvarpsvef Vísis. Einnig er hægt að hlusta á þáttinn á öllum helstu hlaðvarpsveitum.