Segir róðurinn vera að þyngjast fyrir Ísraels­menn

Í viðtali í Sprengisandi á bylgjunni segir Þórdís að stöðugt versnandi staða hundruða þúsunda á hálfgerðum vergangi í og við Rafaborg við landamæri Egyptalands valdi dómsvöldum í Haag töluverðum áhyggjum. Mikið hafi verið spurt um hvernig Ísraelsmenn hygðust bregðast við ástandinu en fátt hafi verið um svör.

„Svo kemur þessi úrskurður og þeir verða að draga úr hernaðinum í Rafah til að tryggja það að þetta fólk geti ekki orðið fórnarlömb þjóðarmorðs,“ segir Þórdís.

Sultur sem herkænska

Hún bendir á að hryggjarsúlan í beiðninni sé sú að ísraelsk stjórnvöld beiti sulti vísvitandi sem hernaðaraðferð. Það teljist glæpur gegn mannkyni. Þórdís segir handtökuskipunin á hendur Benjamín Netanjahú, forsætisráðherra Ísraels sem og öðrum háttsettum ráðamönnum þar í landi, gjörbreyta stöðu landsins á alþjóðavettvangi.

„Það er stórmál, bæði pólitískt og lagalega. Hann er líka mjög þungorður í sinni yfirlýsingu. Hann ítrekar það að sömu lög verði að gilda um alla. Þetta er náttúrlega dómstóll með mjög mörg mál í gangi. Meðal annars gegn Rússlandi og málum í Súdan og Venesúela og Búrma. Hann segir að ef lögin eigi bara að gilda um suma en ekki aðra þá erum við að grafa undan öllu kerfinu og það bara hrynur,“ segir Þórdís.

Bandaríkjamenn í þversögn

Þórdís segir einnig að ákveðinnar hræsni gæti í viðbrögðum sumra Vesturlanda við ákvörðun Karim Khan, aðalsaksóknara sakamáladómstólsins, að biðja um handtökuskipunina. Málið svipi mikið til ákæru dómstólsins á hendur rússneskum yfirvöldum vegna stríðsglæpa í Úkraínu.

„Það var svolítið vendipunktur þegar Úkraína kemur inn í þetta. Þeir sem eru að gagnrýna núna helst lögsögu dómstólsins er líka sömu ríki og eru að styðja dómstólinn í að saksækja glæpi í Úkraínu af hálfu Rússa. Þeir eru að fara svolítið í þversögn,“ segir hún.

„Bandaríkjamenn eru núna að styðja málsókn gegn Pútín fyrir þessum alþjóðasakadómstól. Og þeir eru í því að reyna að búa til enn annan dómstól til að ákæra Pútín fyrir árás sem er sitjandi þjóðhöfðingi í landi sem hefur þá enga aðild að þessum dómstól,“ bætir hún við.

Hún segir ísraelsk stjórnvöld vera að einangrast og að það sé erfiðara og erfiðara fyrir alþjóðasamfélagið að taka ekki afstöðu þrátt fyrir mótmæli Bandaríkjamanna og annarra.

„Það hafa allir samúð með þessum hörmungum sem átti sér stað þann sjöunda október en hvernig þeir eru að beita þessum hernaði það er að tikka í öll þessi box og vekja þetta kerfi allt upp,“ segir Þórdís.