Keypti gallaðan kveikjara og fær 50 þúsund krónur

Í úrskurði kærunefndar vöru- og þjónustukaupa segir að konan hafi fest kaup á notuðum kveikjara úr gulli í verslun seljandans og greitt 50 þúsund krónur fyrir. Skömmu síðar hafi hún uppgötvað að hjólið á kveikjaranum væri mjög stíft en seljandinn ráðlagt henni að láta smyrja kveikjarann, sem hún og gerði, en kveikjarinn verið alveg jafn stífur í kjölfarið. 

Konan hafi því farið í verslunina á nýjan leik og beðið um að fá annað hvort endurgreitt fyrir hann eða nýjan kveikjara. Seljandinn, sem rekur umboðssölu með notuðum merkjavörum, hafi hins vegar sagt kveikjarann í góðu ástandi við kaupin. Hins vegar hafi kaupandinn skilað kveikjaranum í ólagi eftir að hafa sjálf tekið ákvörðun um að láta framkvæma viðgerð á honum.

Þá bendir sölumaðurinn á að verslunin selji notaðar merkjavörur og að kaupandi geti ekki ábyrgst að seldar vörur séu eins og nýjar. Í skilmálum verslunarinnar, sem og á skilti í versluninni, komi skýrt fram að vörum í umboðssölu verði hvorki skilað né skipt.

Nefndin komst að þeirri niðurstöðu að óumdeilt sé að kveikjarinn hafi verið stífur og ónothæfur þegar konan skilaði honum í verslunina og telur kærunefndin sýnt fram á að kveikjarinn sé haldinn galla. 

Seljandinn vildi meina að gallinn hefði komið upp eftir að hann var afhentur kaupanda en hún benti á að ekki hafi verið hægt að prófa hann fyrir kaupin þar sem vantað hefði gas á hann. Kaupanda og seljanda greindi á um hvort kaupandinn hafi farið með kveikjarann í viðgerð af eigin frumkvæði eða samkvæmt ráðleggingum seljandans. 

Konan sem keypti kveikjarann hafði að mati kærunefndarinnar ekki sýnt fram á að galli á kveikjaranum hafi komið upp eftir afhendingu hans. Því verði að líta svo á að galli hafi verið til staðar við afhendingu kveikjarans þegar kaupin fóru fram. Eins og mál þetta er vaxið telur kærunefndin að galli kveikjarans sé ekki óverulegur, enda nýtist hann kaupanda ekki og er því fallist á kröfu hennar um riftum kaupanna. 

Að því sögðu er seljandanum gert að endurgreiða kaupandanum þær 50 þúsund krónur sem kveikjarinn kostaði. Þá ber honum að greiða gjald vegna kostnaðar nefndarinnar af meðferð málsins að fjárhæð 35 þúsund krónur.