Löggan keyrði mann í stéttina og skutlaði hráka­poka um höfuð hans

Pétur Eggerz hefur tekið sig til og birt myndbandsbrotin sem tekin eru við hátíðarhöldin á 17. júni, fyrir ofan Sólon á horni Ingólfsstrætis og Bankastrætis. 

„Þetta er mesta niðurlæging og hlutgerving (e. dehumanizing) sem ég hef séð,“ segir Pétur.

Á myndbandsbrotunum má sjá fimm vörpulega lögreglumenn keyra mann í götuna, með hné á höfði hans og setja svo hrákapoka á höfuð hans. Í síðara myndbrotinu má sjá Áslaugu Örnu Sigurbjörnsdóttur háskóla-, -iðnaðar- og nýsköpunarráðherra prúðbúna í upphlut ganga hjá og gjóta hornhauga á það sem gengur á. Þetta virðist nánast orðið að hversdagslegum viðburði.

Maðurinn í geðrofsástandi

Pétur segist kannast við manninn, hann sé fíkill í geðrofi og segir frá því í myndbrotinu, sem hann talar yfir, að hann hafi eitt sinn talað við hann, tekið í hönd hans og maðurinn þá farið að gráta. Þetta var á afmælisdegi Péturs 7. júní.

„Hann er með fjölþættan fíknivanda, það er vond tilvist. Það á ekki að vera lífshættulegt að fara í geðrof og rekast á lögguna. Þá er það barið – það virðist þemað,“ segir Pétur. Hann telur lögregluna gersamlega vanhæfa til að takast á við fólk í slíkri stöðu og staðan bara versni. Engin úrræði séu sjáanleg.

„Ung stúlka dó í höndum lögreglu. Hún var í geðrofsástandi. Ég hef þurft að jarða tvo af tvo af bestu vinum mínum og fyrir þrítugt. Allir vita að ef manneskja er í geðrofsástandi þá kemst hún ekki inn nema hún sé með merki um reipi um hálsinn og/eða skorinn úlnlið. Og þeir eru að komast inn í kerfi sem er ekki hannað til að ná neinum árangri. Ekki lágmarksárangri.“

Pétur segir að maðurinn sem þarna er tekinn fyrir tali hvorki ensku né íslensku. Þetta sé fíkill og hann sé í geðrofsástandi allan daginn.

„Að lögreglan geti ekki nálgast hann af meiri nærgætni sýnir hversu vanhæf lögreglan er að vera í nokkurs konar friðargæslu.“

Varð sjálfur fyrir efnavopnaárás

Pétur segir einsýnt að eitthvað hafi breyst á umliðnum árum. Lögreglan sé orðin miklu herskárri en var fyrir fáeinum árum.

„Þetta er eitt stærsta spurningarmerki sem setja má við lögregluna, þetta er ekki mikil ást til fólks sem þarna sýnir sig.“

Pétur nefnir atvikin sem gerðust 12. júní og 31. maí, þegar lögreglan úðaði piparúða á mótmælendur í Skuggasundi, friðsama að sögn Péturs.

„12. maí var óeinkennisklæddur sérsveitarmaður sem gaf lögreglunni fyrirskipanir um að nú skildi ráðast gegn borgurum. Og nota piparúða sem skilgreinist sem efnavopn.“

Pétur segir þetta allt documenterað, hann sjálfur gefi út hráheimildir á bæði YouTube og á instagram-reikningi sínum sem er instagram.com/petur_eggerz. Pétur sjálfur var viðstaddur við mótmæli þegar lögreglan greip til þess að spreyja piparúða á mannskapinn 31. maí.

„Já, þá var ráðist á mig með efnavopnum. Þegar ég var við friðsöm mótmæli.“

Kæra á hendur stjórnvöldum á leiðinni

Pétur telur fjölmiðla ekki hafa sinnt því að greina rétt frá, lögregla og dómsmálaráðherra hafi einfaldlega afskrifað málið í viðtölum.

„En þetta er allt til á myndbandsupptökum. Forsætisráðherra stígur upp á þjóðhátíðardaginn rétt áður en sendisveinar valdstjórnarinnar lemja fíkla og almenna borgara.“

Pétur segir hjarta sitt brotið, að íslensk lýðveldi sé komið á þennan stað. Að honum blöskri sé vægt til orða tekið.

„Það er verið að vinna í að kæra það atvik. Kæran kemur út í vikunni. 

Við þolendur höfum tekið okkur saman og erum með lögfræðinga hjá Rétti og mannréttindastofnun og erum að fara að stefna ríkinu. Mannréttindabrotin eru svo mikil og vel documenteruð.“

Pétur segir að fólk geti kynnt sé málavöxtu sjálft með því að skoða þær hráheimildir sem hann hefur gefið út.