Bylgju­lestin endaði sumarið í Hafnar­firði

Umsjónarmenn Bylgjulestarinnar þessu sinni voru þau Bragi Guðmunds og Kristín Ruth. Fjöldi gesta mætti í miðbæinn og átti góðan dag en útvarpað var beint frá Hafnarfirði milli kl. 12 og 16.

„Páll Eyjólfsson, gjarnan kenndur við hljómsveitina Papa, hefur haft veg og vanda af hátíðinni og hann kíkti í Bylgjubílinn til að fara yfir dagskrána þessa helgina og sömuleiðis um næstu helgi en þá verður Í hjarta Hafnarfjarðar slúttað með stæl,“ segir Bragi.

Hulda Margrét ljósmyndari mætti í Hafnarfjörð og fangað stemninguma meðal bæjarbúa og gesta.

Trúbadorinn Tryggvi Vilmundarson tók lagið fyrir hlustendur en hann hefur komið fram á hátíðinni allar helgarnar. Lagið var í anda Hafnarfjarðar, Skýið eftir Björgvin Halldórsson og Villa Vill.

„Dagný Rut, sem rekur hina 53 ára gömlu verslun Músík og Sport, sagði okkur frá stemningunni í miðbænum og að lokum kíkti Hreimur Örn og tók að sjálfsögðu þjóðhátíðarlagið sem öll þjóðin þekkir, Lífið er yndislegt,“ bætir Kristín við.

Það var líf og fjör allt í kringum Bylgjubílinn að venju. Boðið var upp á andlitsmálun og Blaðrarinn gladdi börnin eins og honum er einum lagið. Askja var á svæðinu með nýjustu bílana auk þess sem hægt var að gæða sér á ljúffengum götubita.

Þetta var eins og áður segir síðasti áfangastaður Bylgjulestarinnar í ár. Hún tekur að sjálfsögðu aftur af stað að ári en óvíst er hvert leiðin liggur þá. Starfsfólk Bylgjunnar þakkar öllum sem ferðuðust með í sumar fyrir samfylgdina. Þið eruð frábær!