Antony hreinsaður af á­sökunum í Brasilíu

Hinn 24 ára gamli Antony hefur ekki átt sjö dagana sæla síðan hann gekk í raðir Man United sumarið 2022. Eftir fína byrjun í Manchester-borg þá fjaraði undan fínni spilamennsku hans og á síðustu leiktíð var hann settur tímabundið til hliðar eftir að fyrrverandi kærasta hans ásakaði hann um líkamlegt ofbeldi í sinn garð.

Nú greina enskir fjölmiðlar, þar á meðal The Telegraph, frá því að lögreglan í Brasilíu hafi hreinsað vængmanninn af öllum ásökunum. Antony hefur ávallt haldið fram sakleysi sínu og aðstoðað lögregluna bæði í Brasilíu og á Englandi.

Lögreglan á Englandi er enn með málið á sínu borði þar sem kærastan fyrrverandi segir sum brotin hafa átt sér stað þar í landi.

Antony sat allan tímann á varamannabekk Man Utd þegar liðið lagði Fulham 1-0 í 1. umferð ensku úrvalsdeildarinnar.