Gular við­varanir í hvass­viðris

Á vef Veðurstofunnar segir að á Suðurlandi verði viðvörunin í gildi milli 12 og 18 þar sem hvassast verður undir Eyjafjöllum og í Selvogi með vindhviðum að 35 til 40 metrum á sekúndu. Á miðhálendinu er viðvörunin í gildi milli 13 og 22.

Fram kemur að það fari að rigna um áttaleytið syðst á landinu og svo dreifist úrkomusvæðið til norðurs og rigning verði víða um landið síðdegis. Þurrt að kalla norðaustanlands fram undir kvöld.

Hiti á landinu verður á milli átta og þrettán stig. Það dregur úr vindi í kvöld og styttir upp í nótt.

„Á morgun verður suðvestan 5-13 m/s, skýjað og sums staðar dálítil væta, en norðlægari og úrkomumeira á norðvestanverðu landinu. Næsta lægð lætur á sér kræla eftir hádegi. Því þá snýst í austlæga átt 8-15 m/s og svo kemur næsta gusa seinnipartinn og á miðvikudag. Milt í veðri.

Dregur úr vætu seint á miðvikudag og þá er útlit fyrir nokkra daga með hægum vindum, skýjað með köflum og lengst af þurrt. Hiti 5 til 10 stig að deginum,“ segir á vef Veðurstofunnar.

Veðurhorfur á landinu næstu daga

Á þriðjudag: Suðvestlæg átt, víða 5-13 m/s og smá skúrir, en gengur í austan og suðaustan 10-15 með rigningu um kvöldið. Þurrt að kalla austanlands. Hiti 8 til 15 stig, hlýjast austantil.

Á miðvikudag: Suðlæg átt 10-18, en norðlægari norðvestantil. Víða rigning en úrkomulítið á Norðausturlandi. Hiti 10 til 18, hlýjast norðaustantil, en svalara á Vestfjörðum. Snýst í vestlæga átt 5-13 um kvöldið.

Á fimmtudag: Suðvestlæg eða breytileg átt 3-8, skýjað og sums staðar lítilsháttar væta. Hiti 5 til 10 stig yfir daginn.

Á föstudag: Fremur hæg suðaustlæg átt og bjart með köflum. Hiti breytist lítið.

Á laugardag: Austlæg átt og skýjað, en yfirleitt bjart vestanlands. Hiti 3 til 8 stig.

Á sunnudag (haustjafndægur): Útlit fyrir breytilega átt, skýjað og dálítil væta á víð og dreif. Hiti breytist lítið.