Cole Campbell á bekknum hjá Dortmund

Cole á íslenska móður, fótboltakonuna fyrrverandi Rakel Ögmundsdóttur, og spilaði fyrir yngri landslið Íslands. Á þessu ári ákvað hann hins vegar að spila fyrir Bandaríkin í framtíðinni en faðir hans er bandarískur. Cole skoraði tvö mörk í fyrsta leik sínum fyrir U-19 ára landslið Bandaríkjanna.

Í sumar skrifaði Cole undir nýjan fjögurra ára samning við Dortmund. Hann hefur gert góða hluti með unglingaliði félagsins og er nú kominn upp í aðalliðið og gæti þreytt frumraun sína með því í dag.

Cole æfði í unglingaakademíu Atlanta United en fór ungur til FH. Hann lék sinn fyrsta leik með FH aðeins fimmtán ára gamall og spilaði alls þrjá leiki í efstu deild á Íslandi, þar af einn þeirra með Breiðabliki.

Hinn átján ára Cole gekk til liðs við Dortmund fyrir þarsíðasta tímabil og hefur staðið sig vel með unglingaliði félagsins eins og áður sagði.