Minnist Baldocks með hlýju: „Honum þótti alltaf vænt um Vest­manna­eyjar“

Baldock var nýgenginn í raðir Panathinaikos en fram að því hafði hann leikið allan sinn feril á Englandi fyrir utan sumarið 2012 þegar hann lék með ÍBV í Pepsi-deildinni. Baldock stimplaði sig vel inn í Eyjaliðið sem endaði í 3. sæti Pepsi-deildarinnar og náði Evrópusæti.

Meðal samherja Baldocks þetta sumar var Þórarinn Ingi Valdimarsson, núverandi leikmaður Stjörnunnar. Honum brá við að heyra fréttirnar af sínum gamla liðsfélaga.

„Þetta var bara sjokk, að heyra að strákur sem er yngri en maður sjálfur hafi fundist látinn. Og strákur sem maður þekkti og var þekkt stærð í fótboltaheiminum. Það var hræðilegt að heyra af þessum atburði,“ sagði Þórarinn í samtali við Vísi.

Frábær týpa og karakter

Baldock er uppalinn hjá MK Dons og lék 125 leiki fyrir liðið. Það tók hann þó sinn tíma að brjóta sér leið inn í aðallið félagsins og hann var lánaður til Northampton Town og Tamworth veturinn 2011-12. Og sumarið 2012 var hann svo lánaður til ÍBV sem var á þeim tíma undir stjórn Magnúsar Gylfasonar.

„Hann var nítján ára þegar hann kom til okkar, strákur sem var að vinna sig upp í boltanum. Þetta var frábær týpa og karakter og skemmtilegt að vera í kringum hann. Þetta var gæi sem lagði sig allan fram á vellinum, var baráttuhundur og alltaf tilbúinn að vera með félögunum og hafa gaman. Ég hef bara jákvæða hluti um hann að segja og maður heyrt það sama úr öðrum áttum; að þetta hafi verið hress strákur sem lagði sig allan fram, var tilbúinn að hlaupa og djöflast og bakka mann upp í öllu,“ sagði Þórarinn um Baldock sem lék sextán deildarleiki fyrir ÍBV og skoraði eitt mark. Það kom gegn Grindavík 20. júní 2012 og má sjá í spilaranum hér fyrir neðan.

„Maður gat alltaf treyst á hann. Þótt þetta væri strákur sem var að koma úr akademíu á Englandi var hann tilbúinn að leggja á sig vinnu fyrir liðið og það situr eftir hjá mér. Hann var líka góður í liðspartíunum, hrókur alls fagnaðar og gaman að vera í kringum hann,“ bætti Þórarinn við.

Lét hendur standa fram úr ermum

Þórarinn segir að Baldock hafi passað vel inn í samfélagið í Eyjum.

„Hundrað prósent. Þetta var strákur sem passaði fullkomlega inn. Hann vildi fá mínútur og fékk þær hjá okkur. Hann vantaði aldrei þegar liðið var að gera eitthvað og lét hendur standa fram úr ermum. Þetta var topp náungi,“ sagði Þórarinn.

Baldock fór til Sheffield United 2017 og þá fór ferilinn á flug. Liðið vann sér sæti í ensku úrvalsdeildinni haustið 2019 og tímabilið 2019-20 lék Baldock alla 38 deildarleikina þegar Sheffield United endaði í 9. sæti. Ekki gekk jafn vel tímabilið á eftir og Sheffield United féll. Liðið komst aftur upp fyrir síðasta tímabil en féll í annað sinn í vor. Og þá reri Baldock á grísk mið. Þrátt fyrir að vera fæddur á Englandi og lék hann með gríska landsliðinu, alls tólf leiki, en amma hans var grísk.

Eina sem langaði þetta

Þórarinn segir að velgengni Baldocks hafi ekki komið sér á óvart. Dugnaðurinn og hugarfarið sem hann sýndi hafi verið þess eðlis að það myndi koma honum langt.

„Maður hefur fengið nokkra svona lánsmenn, sérstaklega í Vestmannaeyjum, en þetta er eini gæinn sem langaði þetta ógeðslega mikið. Hann æfði af krafti og lét verkin tala. Síðan var hann allt í einu kominn í ensku úrvalsdeildina. En maður sá að hungrið var til staðar. Þetta kom mér ekki á óvart, ekki miðað við hvernig hann var sem karakter á þessum tíma,“ sagði Þórarinn.

„Honum þótti alltaf vænt um Vestmannaeyjar og hann þurfti á þessu að halda á sínum tíma, að taka þetta stökk. Það er fínt fyrir yngri stráka að horfa í hvernig þessi ferill þróaðist,“ bætti Þórarinn við.