Norrköping er nú fjórum stigum frá fallsæti þegar liðið á tvo leiki eftir á tímabilinu. Fyrir leikinn munaði aðeins einu stigi á Norrköping og Värnamo.
Christoffer Nyman kom Norrköping yfir á 25. mínútu og á 59. mínútu skoraði Arnór Ingvi annað mark liðsins. Þetta var fimmta mark hans í sænsku úrvalsdeildinni á tímabilinu.
59’ MÅÅÅÅÅL! DMK:s frispark letar sig fram till Traustason som är dödlig i boxen. Trycker in 2-0 i bortre och glider på knäna framför våra tillresta supportrar.
— IFK Norrköping (@ifknorrkoping) October 27, 2024
VÄR - IFK | 0-2 ⚪️🔵#ifknorrköping
Samuel Kotto minnkaði muninn fyrir Värnamo þegar fjórar mínútur voru til leiksloka en nær komust heimamenn ekki. Ísak Andri Sigurgeirsson sat allan tímann á varamannabekknum hjá Norrköping.
Andri Fannar Baldursson og Eggert Aron Guðmundsson komu báðir inn á þegar stundarfjórðungur var eftir af leik AIK og Elfsborg. AIK vann leikinn, 2-1.
Þetta var þriðja tap Elfsborg í röð en liðið er í 8. sæti deildarinnar. Eggert hefur fengið fá tækifæri með liðinu á tímabilinu en fyrir leikinn í dag hafði hann ekki spilað mínútu með Elfsborg síðan 1. september.
Í dönsku úrvalsdeildinni lék Sævar Atli Magnússon allan leikinn þegar Lyngby tapaði fyrir Vejle, 2-0, í uppgjöri neðstu liðanna. Lyngby hefur aðeins unnið einn af fyrstu þrettán deildarleikjum sínum á tímabilinu og einungis skorað átta mörk.
