Fótbolti

AGF bar sigur úr býtum í Íslendingaslag og fór upp í annað sæti

Ágúst Orri Arnarson skrifar
Mikael Neville Anderson átti góðan leik á miðjunni hjá AGF sem fór upp í annað sæti deildarinnar. 
Mikael Neville Anderson átti góðan leik á miðjunni hjá AGF sem fór upp í annað sæti deildarinnar.  Vísir/Getty

AGF tók á móti Lyngby í Íslendingaslag í dönsku úrvalsdeildinni og vann 2-1 þökk sé marki í uppbótartíma. Mikael Neville Anderson hjá AGF og Sævar Atli Magnússon hjá Lyngby voru báðir í byrjunarliðunum.

AGF var töluvert sterkari aðilinn og ógnaði markinu meira. Ísinn brotnaði á 34. mínútu þegar hægri hafsent Lyngby, Pascal Gregor, setti boltann óvart í eigið net.

Lyngby barðist til baka og setti jöfnunarmark undir lok seinni hálfleiks, Sævar Atli var þá nýfarinn af velli fyrir Frederik Gytkjær sem skoraði.

Sævar Atli Magnússon lék 82 mínútur í fremstu línu Lyngby en vék af velli fyrir markaskoraranum.Getty/Lars Ronbog

Allt stefndi í jafntefli en á fimmtu mínútu uppbótartíma potaði framherjinn Patrick Mortensen inn sigurmarki fyrir AGF.

Mikael Neville Anderson lék allan leikinn, hægra megin á þriggja manna miðju AGF.

AGF fór með þessum sigri upp að hlið meistaranna Midtjylland, aðeins einu stigi frá efsta sætinu. FC Kaupmannahöfn gæti reyndar tekið fram úr þeim báðum með sigri gegn Silkeborg á morgun.

Lyngby er í verri málum, í 11. sæti deildarinnar með aðeins níu stig eftir fjórtán leiki.

Danski boltinn

Mest lesið


Fleiri fréttir

Sjá meira


×

Mest lesið