„Hversu góð tök hefur þú á Rúrik?“

Þetta er meðal þess sem fram kemur í kvikmynda- og sjónvarpshlaðvarpinu Tveir á toppnum þar sem Hannes er gestur. 

Hannes er einn öflugasti kvikmyndagerðarmaður landsins en hann stendur að baki tveimur vinsælustu þáttum landsins þessa dagana, þáttunum um strákasveitina Iceguys og Bannað að hlæja með Auðunni Blöndal.

Curb your enthusiasm og Klovn meðal fyrirmynda

Hannes segir frá því í hlaðvarpsþættinum hvernig Jón Jónsson hafi haft samband við hann í fyrra og spurt hvort hann væri til í að gera tónlistarmyndband með honum fyrir sumarið. Í bígerð var að fá með þá Herra Hnetusmjör, Aron Can og bróður Jóns Friðrik Dórs auk Rúriks Gíslasonar fyrrverandi landsliðsmann og dansstjörnu. Jón hafi beðið Hannes um að heyra í sínum fyrrum liðsfélaga í íslenska karlalandsliðinu í knattspyrnu.

„Hversu góð tök hefur þú á Rúrik?“ spyr hann. Ég hringdi í Rúrik og hjálpaði þeim eitthvað við að sannfæra hann um þetta og reyndi að peppa þetta. Svo kom næsta símtal frá þeim og þá var þetta svona: „Heyrðu Rúrik er að hitna en það kom hérna upp hugmynd, ef við ætlum að gera þetta, eigum við að stækka þetta og gera eitthvað í kringum þetta?“

Hannes segist þá hafa tekið við boltanum. Hann hafi verið með gamla hugmynd ofan í skúffu að heimildarþáttum. Hann hafi lengi verið aðdáandi þátta líkt og Curb your enthusiasm og Klovn þar sem þekktir einstaklingar leika sjálfa sig og gera grín að sér í leiknum seríum. Hannes segist þá hafa ákveðið að máta þetta við strákana sem þá áttu eftir að mynda Iceguys.

Allir efins

„Ég hringdi í Sóla og bar þetta undir hann. Hann var mjög efins, það voru allir mjög efins með þetta og við höfðum bara viku til þess að setja þetta saman í einhverri algjörri stemningu, af því að Síminn gaf síðan grænt ljós á þetta eiginlega á fyrsta fundi,“ útskýrir Hannes sem segist sérstaklega þakklátur Birki Ágústssyni sjónvarpsstjóra Símans.

„Af því að ég veit að það var ekki einhugur með þetta, af því að við komum þarna inn með ekkert. Þetta var bara: „Þetta eru nöfnin, þetta er pælingin, gera einhverskonar þætti um þetta, búa til concept í kringum þetta,“ segir Hannes. Hann segist hreyknastur af því hvað þetta hafi gengið langt, þeir hafi raunverulega stofnað bandið sem síðan hafi sprungið út en eins og alþjóð veit seldi sveitin nítján þúsund miða á jólatónleika nú í desember.

„Þetta náttúrulega sprakk út með einhverjum ævintýralegum hætti sem okkur óraði ekki fyrir og ég var mjög óviss með þetta þegar við lögðum af stað. Þá var ég með hugmyndir um allt annað og plön sem eru svo sem ennþá í gangi en ég var allavega ekki að fara að gera einhverja sjónvarpsþætti sem heita Iceguys um eitthvað boyband.“